#حوار_الصعاليك.
الصعلوك الأول: 🧑🦰
الصعلوك الثاني: 🤵♂️
🧑🦰: يا أخي ملّيت من هالروتين والوضع داقر هاليومين.
🤵♂️: خير ليه؟
🧑🦰: يا أخي أنا أحب الشهرة وشايف كثير من الصعاليك يلي مثلنا انشهروا وبدي انشهر مثلهم وأكون ذو شأن والناس كلها تعرفني وتتكلم عني.
🤵♂️: سهلة.
🧑🦰: كيف سهلة؟!
🤵♂️: يووووه أنت لساتك غر وبدك فت خبز حتى تفهم.
🧑🦰: مقبولة منك بس فهمني كيف؟
🤵♂️: أنت بدك تدخل التاريخ من أوسع أبوابه ولا من أوسخ أبوابه؟
🧑🦰: ما يهم، المهم أدخل التاريخ وأصير مشهور حتى لو كان من أوسخ أبوابه.
🤵♂️: تمام، معناها إنكش المسلمين وشوف كيف رح تنشهر وتتحول من صعلوك غير مشهور إلى صعلوك مشهور.
🧑🦰: يا أخي الصعلوك لا تتكلم بالألغاز، فهمني كيف؟
🤵♂️: حاول إثارة المسلمين واستفزازهم من خلال مقدساتهم.
🧑🦰: ما فهمت عليك.
🤵♂️: يعني حاول تسيء لنبيهم أو ترسم صورة كاريكاتورية عنه أو تحرق شي نسخة من كتابهم المقدس وتوثّق فعلك بالصوت والصورة.
🧑🦰: بس ممكن ما يهتمون لأن هذا الفعل لا يقدم ولا يؤخر ولا يؤثر على دينهم.!!
🤵♂️: هذا الكلام صحيح لكن هم لهم رأي آخر، هم تحركهم عواطفهم، وبمجرد أن ينتقد شخص مقدساتهم رح تثور ثائرتهم، ورح يشهروك من دون ما تدفعلهم ولا فلس ومن دون ما تعمل أي حملة اعلانية ولا تدفع شي، الله وكيلك يعملولك دعاية مجانية ما تحلم بيها، أنت جرّب وما رح تخسر شي.
🧑🦰: ماشي رح أجرّب…
وبعد الانتهاء من هذا الحوار، قام الصعلوك الأول بحرق نسخة من القرآن لأنها أسهل طريقة، كونه لا يجيد القراءة ليقرأ الكتب ليستهزء بها ولا يجيد الرسم ليرسم نبي الإسلام بطريقة ساخرة، فوجد أن أسهل طريقة لاستفزاز المسلمين ودغدغة عواطفهم هي حرق نسخة من كتابهم المقدس تنفيذًا لنصيحة صديقه الصعلوك الثاني.
وبعد يومان التقى الصعلوكان من جديد وجرى بينهما الحوار التالي:
🧑🦰: يا رجل وينك من زمان، لك أنت كنز الله وكيلك.
🤵♂️: ها بشّر شصار معاك؟ لأن الجوال عندي كان عطلان وما تابعت الأحداث.
🧑🦰: يا سيدي اسمي صار على كل مواقع التواصل الاجتماعي وكل القنوات الفضائية صارت تتحدث عني بعد ما كنت صعلوك محدا داري عني.
🤵♂️: ممتاااااز، ومين عمل لك شُهرة؟
🧑🦰: مثل ما قلت يا أخي الصعلوك، المسلمين هم يلي شهروني، يا رجل تصور بمجرد اني حرقت القرآن وصوّرت الحادثة، لسى ما وصلت البيت إلّا وصرت ترند على كل المواقع وصارت القنوات الفضائية تتكلم عني وصرت شغلة بعد ما كنت نكرة.
تصوّر كنت ولا شي، يعني حتى جاري السبعيني كان كل ما يشوفني يتفّ بوجهي لأني عطّال بطّال لا شغلة ولا عملة.
🤵♂️: هي الأخبار الطيبة، والآن صار جارك يشوفك ذو شأن بعد ما صرت ترند.
🧑🦰: لأ، لساته يتفّ بوجهي، 😏
🤵♂️: له له ليه؟
🧑🦰: طلع ما يتابع أخبار ولا يستخدم الانترنت، يعني لساتني بنظره صعلوك غير مشهور….
وهكذا يا أصدقائي الكرام، انتهى هذا الحوار بين الصعلوكان بعد أن أصبح الصعلوك الأول من المشاهير بفضل المسلمين الذين جعلوا من الحمقى والصعاليك مشاهير، وانتظرونا بالحلقة القادمة بصعلوك جديد سينشهر على يد المسلمين.
وتوتة توتة خلصت الحدوتة.
#فكر_من_جديد.
حسين الخليل
يمكنك دعم الموقع من هنا
مؤسسة ندى لحماية الفتيات
الجار السبعيني 🤣🤣