حصل في مرة انك كنتي مضغوطة في شغلك او مع ولادك وحبيتي تخرجي ولقيتي انه اختياراتك…

حصل في مرة انك كنتي مضغوطة في شغلك او مع ولادك وحبيتي تخرجي ولقيتي انه اختياراتك محدودة لحاجات انت مش حباها، او مش عندك القدرة المادية انك تخرجي، او عندك اولاد ومش عارفه تخرجي ازاي معاهم، فقررتي انه الموضوع ميستاهلش ورجعتي في كلامك؟

للأسف بنات كتير بتواجه المشكله دي، ودا ليه اسباب كتير منهم أنه أماكن الترفيه للبنات محدوده جدا وغالبا اسعارها مبالغ فيها، وفي الوقت اللي الرجاله تقدر تنزل تقعد على قهوة ومتصرفش اكتر من 20 جنيه، البنات لو حبت تقعد علي كافيه او تاكل في مطعم- ودي اقل الخروجات تكلفة- بتبقي محتاجه ميزانيه أضعاف الرقم دا.

والمشكله دي بتبقي اكبر لو الست دي ام، لانه الاماكن اللي موجود فيها مكان للأطفال قليله جدا وغالية جدا ومش متاحة لمعظم الأمهات، دا غير أنه معظم الأمهات دلوقتي وبعد الجرايم اللي بنسمع عنها في الاخبار وكمية الاطفال اللي بيتم الاعتداء عليهم في الاماكن دي بتخليهم مش قادرين يآمنوا على أطفالهم فيهم.

وكمان لو مجموعة بنات قرروا ينزلوا مصيف مع بعض مش هيلاقوا شقة يأجروها أو حتي فندق يستقبلهم بسبب انه محدش بيقبل بنات لوحدهم، ودا بيقفل اقتراح المصايف لجزء كبير من البنات.

وكل دا كمان بيزيد عليه مشكلة الضرايب الوردية، واللي بتبقي سبب في رفع تمن اي سلعة بنسبة كبيرة عن سعرها الطبيعي لمجرد أنها موجهه للبنات، واللي بتتطبق حتى على السلع الأساسية، زي الفوط الصحية او السلع اللي بتخص الدورة الشهرية بشكل عام، ودا اللي بيخلي الستات تعتبر اي وسيلة للترفيه مش ضرورية وممكن يستغنوا عنها، ودا علشان مش هيقدروا يوفروها وهما بيعانوا بس علشان يقدروا يجيبوا الحاجات الأساسية.

المشكلة دي ممكن تبان لناس كتير بسيطه بالنسبه لمشاكل تانيه الستات بتعاني منها في مجتمعنا، لكن تأثيرها كبير اوي على الحالة النفسية لستات كتير بسبب تعرضهم لفترات طويلة من الضغط من غير اي وسيلة للتنفيس عن نفسهم.

تفتكروا ايه اللي ممكن يتعمل علشان نحل مشكلة زي دي؟

كتابة: صوفيا جورجي

#الترفية #البنات #توعية

يمكنك دعم الموقع من هنا
مؤسسة ندى لحماية الفتيات