قانون منصف للستات ، حكايات نجاة
“أنا مدخلتش محاكم ولا جربت احتك بالقانون، بس كنت محتاجة أدفع مصاريف مدارس ولادى ، ومن هنا بدأت رحلتى مع القانون”
دي كانت بداية معاناة أم من ستات “نجاة” علشان تاخد حكم يلزم الأب بسداد مصاريف أولاده ، بس هل دة اللى بيحصل ؟ طبعا لأ
آلاف الستات بتقعد سنين فى المحاكم علشان تثبت دخل الزوج و قبل ده تروح تدفع مصاريف أولادها ، ودة ضغط إضافي عليها مع مصاريف الأكل و الشرب و إيجار البيت ، سنين من الجري في المحاكم علشان تاخد حكم على ورق فى أغلب الحالات مش بيتنفذ!
القانون الحالى صريح إن الأب ملزم بسداد المصاريف الدراسية لأولاده ، وفي حالة عدم السداد، فمن حق الأم سداد المصاريف الدراسية، بعدها تروح ترفع دعوى مطالبة بسداد المصاريف وتقدم معاها صورة رسمية من إيصالات السداد، زى ما احنا عارفين طبعا الحكم بيكون لصالح الأم بإن الأب يدفع المصاريف بعد ما نشوف الدخل بتاعه كمان، ولأن القانون مش بيضمن للأم تنفيذ الحكم فبيبقى حكم على ورق، ده بالإضافة إن نفس المشوار ده بيتعمل كل سنة عشان تاخد مصاريف أولادها
محتاجين تعديل للقانون الحالى بإجراءات قوية تضمن للأم بعد سنين فى المحاكم على الأقل فى الآخر تنفذ الحكم ، طبعاً ده مش هيبقى الحل الوحيد من غير تسهيل إجراءات التقاضي ، و إن الزوجة ترفع دعوى واحدة علشان تاخد الحقوق بتاعتها بعد الطلاق ومنها مصاريف الدراسة، وإن يكون فيه إلزام للراجل بشكل مباشر بدفع مصاريف أولاده وتنظيم الأمور المالية للأطفال بعد الطلاق بدون تحرك إجباري للأم عشان تنال حقوق أطفال الأساسية من أبوهم.
حسب مقترح مؤسسة قضايا المرأة المصرية – Centre for Egyptian Women Legal Assistance لمسودة قانون الأحوال الشخصية قدمت أكتر من حل للمشكلة دي زي إنشاء جهة تنفيذية معنية بتنفيذ كافة أحكام محاكم الأسرة الخاصة بملف الأسرة الواحد لتنفيذ كل ما جاء بأحكامها في كافة النزاعات المعروضة وفقا لنص القانون كما تختص بتنفيذ أحكام النفقات والأجور، وده هيوفر وقت ومجهود كبير على الأمهات الحاضنات كمان هيحمي حق الست في تنفيذ حكم موجود على الورق فقط و مالوش قيمة.
# لسه_في_حياتك_نجاة
# قانون_منصف_للستات
# حكايات نجاة.
#16يوم
#16DaysofActivism2022
#حملة_ال16يوم_لمناهضة_العنف_ضد_المرأة
#سوبروومن
#16days
كتابة: عمرو محمد
يمكنك دعم الموقع من هنا
مؤسسة ندى لحماية الفتيات
