(رسالة إلى الله)
عزيزي الله :
عارف انك موجود وأقرب من حبل الوريد ليا، ومؤمن بعظمتك وعبقريتك ورحمتك، بس عاتب عليك يا سيدي إنك سايب شوية صيّع يتكلموا باسمك ويشوهوا صورتك، ويسرقوا فلوسنا ويصرفوها عليك، مع إنك غني وف إيدك خزاين الكون، واحنا الفقراء إليك وانت الغني عنا…………..
يرضي حضرتك يارب تكلفنا كل سنة تلاتة ونص مليار دولار عشان نزور حضرتك ف صحراء الخراب، هو حضرتك بتسكن بيت زى يهوه رب اليهود اللى كان ساكن- ولامؤاخذة- ف صندوق؟ دة انت أقرب لينا من حبل الوريد، ولاحظ حضرتك إن الدولار بقى غالي أوي وداخل على عشرين جنيه، يعني زيار¬تك بتكلفنا فوق الستين مليار جنيه واحنا أصلا شعب بينام من غير عشا…………..
يرضي حضرتك يارب ، الأزهر اللي مالوش لازمة غير نشر الشر والخراب ياخد مننا 20 مليار جنيه كل سنة عشان يبني أكشاك للفتوى تقولنا نطرطر ازاي ونخش الكانيف- ولامؤاخذة- بالرجل الشمال ولا اليمين؟
يرضي حضرتك يارب ياخدوا مننا مسيحيين ومسلمين 800 مليون جنيه ف الشهر يعني فوق العشرة مليار ف السنة عشان ينوروا ويكيفوا المساجد بتاعة سعادتك؟ يعني هو البيه المؤمن يروح يتكيف ف الجامع وياخد حسنات، واخونا الكافر النصراني يدفع له الفاتورة، وبرضه يخش النار؟
يرضيك يارب ، المؤمنين بتوعك يروحوا يحرقوا بيوت المسيحيين اللي بيذكروا فيها اسمك، ويمنعوهم من الصلاة إلا برخصة؟ عمرك سمعت حضرتك عن الصلاة أم رخصة؟
ويرضى حضرتك يارب ” الرجالة” الصعايدة يشلحوا ست عجوزة فى السبعين من عمرها ويلفوا بيها البلد بلبوصة بس لأنها من دين تانى؟ شفت يارب رجالة الأزهر عملوا ايه ف رجالة مصر؟ شالوا منهم الشرف والنخوة والرجولة وبقوا يتشطروا على مرا…………
أخونا حسن حنفي – الفاجر- بيسأل هو احنا اللي هانصرف عليك يارب ولا انت اللي هاترزقنا؟ رديت عليه وأفحمته، قلت له يا يساري يا كافر، إحنا هانصرف فلوسنا على ربنا وندعيه بعد كدة يرزقنا، وحضرته إن شاء الله مش ها يتأخر ف الإجابة، هي مسافة السكة، وطبعا كلنا عارفين زحمة المواصلات وطول المسافات……………….
وحياة حبيبك النبي ماتزعل مني، أنا بس بسأل زي سيدنا النبي إبراهيم : ليطمئن قلبي، ولو زعلان حضرتك، ولا كأني قلت حاجة………..ويجعله عامر حضرتك.!!!
يمكنك دعم الموقع من هنا
مؤسسة ندى لحماية الفتيات
ريحة قلم شومان واضحة جدا في المنشور. كيف فات على الأصدقاء المثقفين معرفة ذلك
ربنا يخليلنا حضرتك.
نهارك سعيد يا مولانا . على فكرة هيسمع وهيجاوب على كل حاجة ، إن آجلا أو عاجلا بحسب حكمته . طبعا ميرضهوش الحاجات دي لأنه مش محتاج للمممثلين . 😂😂👍👍
هوا ده الكلام اللي يجب على كل إنسان قرأته وحفظه ويعلقه في عنقة عاشت ايدك يا بطل
مناجاة الله و رسالة ممتعة … عاشت الايادي ياباشا
كلام رائع..
لكن كل اصحاب المعتقدات المختلفة بيعملوا نفس الشيء….بيصرفوا على الرب ببناء اماكن فخيمة لعبادته بدلا من توفير هذه الاموال لفقراءهم او لمشروعات تعليمية و صحية مفيدة لابناء عقيدتهم.
الله يجعل كل الاشياء تعمل معا للخير
الهنا اله عظيم صانع العجائب وحده كلي القدره
وله في المووووت مخارج كثيره
اما الحج
فإن الله لم يفرضه الا لمن استطاع اليه سبيلا
ومن كان ماله لايكفيه فغير مجبر
اما مسألة التكاليف الباهضة
فهذه ليست تكاليف الله بل وضعها الحكام
اما الأزهر والكنائس والاموال المخصصة لهم
فهنا يجب أن تكون رسالتك للسيسي وليس الله
تساؤلات منطقية
بس كالعادة مفيش جواب 😉
اعتقد توفيق الحكيم كتب رسالة مشابهة.
Amazing ❤️🌹👍
يالهوى يالهوى يالهوى
وعزته وجلاله مارضى ولا قال كده قال للحج لمن استطاع اليه سبيلا ولو فيه فقراء أولى ولو فيه مرضى أولى ولو فبه يتامى أولى.. ولا قال فيه رجال دين فيه فقهاء بس يعني في زمنا مش محتاج الالوف المألفة من خريج الازهر المعاهد.. وكمان مش محتاجين نشرب مكيفات سجاير ومخدارات ونصرف فلوسنا في الهوا ولا نعطي لاعب كرة ملايين ولا ممثل ملايين ولا طبيب الوف والشعب تحت خط الفقر يعني في النهاية اخنا كمان مانختلفش يعني مش ملايكة كلنا نصابين
هو ده المقال المنسوب لتوفيق الحكيم؟
بلاوي مسيحه انت يا شومان
بنجوووور …القمر
يسعد صباحك يا استاذ
بكدة انتظر الوحى يامولانا 🧐🧐
خف ياموالنا ربنا يسترها معاك 🙏❤️
هات ميكروفون كمان و باعلي صوت . اصلة اطرش
بس حضرتك اسم يهوه دا اسم الإله الحقيقى والتابوت دا تابوت عهد مش اكتر
شابووووه يا مولانا ياريت يسمع وميسدش ودانه ويعمل اطرش
يسلم عقلك وقلمك
كلنا بنقول ده لربنا مسلمين ومسيحيين
حلوة الصورة دى المنظر و انت والباب و العربية .
لكن الكلام …احلى 😊.
صباحك خير وسعادة يامبدع
البوست ده من كام سنه لكن دائما طازج ومناسب
هو ليه تخاطب بصفة ذكر ؟
ههههههههههههههههه
منشور رائع يا صديقي الكريم
الله عليك يافندم والله روعة
صباحك خير وسعادة
أحسن رساله قرأتها لرب الكون حضرتك تؤمن بالله بالطريقة الصحيحة
الرب واقف على الباب يقرع لايقتحم حياة انسان ومنح الانسان حرية الاختيار ومن بدء الخلق قال لادم وحواء امامك طريق للحياة وطريق للموت ثم نصحه اختر الحياة لتحيا لكن ادم اراد ان يصيرمثل الله عارفا الخير والشر ولم يقبل نصيحة الله له فسقط وسقطت معه كل البشريةكل قصة الخلق ومن ذهب الى البصرة سيجد ادلة تاريخية تؤكد ذلكلان الله لايترك نفسه بدون شاهد وحتى الان لو سالت لماذا ابراهيم من كلدان العراق والعراق اقدم بلد على الكرة الارضية وعراق اى قديمة بقدم الخلق
ودن من طين و ودن من عجين !!!
السعوديه اخدت تيران وصنافير بتمن حكة
بس هما 26 مليار ….بس اكيد هو عارف انك غلطان فى الرقم ….🤣🤣
مقال مبهر وجدلي ويحرك المياه الراكده