كتّاب

تبقى غلطان يا صديقى المتابع الجميل لو تخيلت إنى أنا شخصيا…


تبقى غلطان يا صديقى المتابع الجميل لو تخيلت إنى أنا شخصيا وكل علمانيى مصر من ابراهيم عيسى لحد السيد حمدى نفخو بنواجه الإرهاب الإسلامى، أو حتى بنحارب الجماعات المتطرفة، أو إننا بنتكلم بصراحة فى السياسة ورأينا فى رئيس الدولة وفى الهجمة الدينية الشرسة على الشعب المصرى.!!!
إحنا شوية حملان – يعنى خرفان- بنتكلم وعينينا ع الزنزانة والمعتقل، سواء كنت تشرفت بالإعتقال أو خايف منه، وبالتالى انت مش بتعارض إنت ” بتمأمأ” ولو المأمأة بتاعتك عليت شوية، بترجع جرى تهز ليتك ادام البيه المتابع اللى بإشارة من صباع رجله الصغير يرجعك ع البرش تانى……..
أنا شخصيا البعض منكم بيظن إنى شجاع، مش عارف ليه، لا يا ولدى، كلنا بنمأمأ وانا أولهم، ولو عايز أتكلم برجولة بتكلم ع الجروب السرى، صحيح الأمن مخترق الجروب وقد يكون مخترق سرير أوضة النوم، بس ع الأقل هاقول للبيه القاضى أنا بسترجل ف السرير يامعالى الوزير- ماهو نداء القاضى دلوقتى بقى معالى الوزير- لكن ع العام وحق المصحف بلبس لية الخروف وامأ مأ مع الجميع……………
أقولك سر صديقى المحترم: وانا فى السجن رايح أتعرض على رمز من رموز العدل فى الأرض، وواقف متكلبش لابس بيجامة السجن وشبشب ودقنى طويلة وشعرى مشعث وبحايل البيه العسكرى يفك الكلبش شوية، وفى وسط هذه المذلة المذلة أسمع صوت جهورى ” شومان” ؟ مش عايز أسمع اسم الزفت دة تانى، أنا لو مكان القاضى هاديله إعدام مش بس خمس سنين، ومن أول جلسة كمان، غوروه من وشى وماحدش يدخله عليا، دة كافر.!!!
عارف كافر ليه؟ عشان مرة تجرأت وسألت: هو سيدنا النبى أشرف خلق الله ليه؟ مش بسأل ياجماعة لأنى منكر، لا والله دة انا مؤمن صوفى عاشق للذات العلية، أنا بسأل عشان نربى عيالنا على قيم أشرف الخلق يمكن عيالنا يبقوا أشرف زيه.!!!
بقى بتتجرأ وتسأل ياكافر؟ طب مش هارد عليك واسجنك عشان تحرم انت وأمثالك تسألوا، خذوه فغلوه وفى أعماق السجن ارموه، دة كافر وبيسأل.
من يومها يا مولانا بنمأمأ بس بصوت أسود عشان تحس إن دة زئير الحمل أو مأمأة الأسد، وعنها ياسيدنا وهانفضل نمأمأ وانت سيادتك تفضل تاكل برسيم الجامع والكنيسة، والريس هايتحاسب أدام ربنا، وشيخ الأزهر هايفضل ربكم الأعلى…………..
ومازلنا نمأمئ بكل رجولة ………………………..
حزنى عليكى يا بلدى اللى ماعاد فيكى راجل…………………


يمكنك دعم الموقع من هنا
مؤسسة ندى لحماية الفتيات

‫25 تعليقات

  1. اذا كانت دي هي إمكانيات البشر..في الغباء والزكاوة..وزي ما انت عارف ربنا فوق كل المكر وشغل السياسة سواء في البدو او في الحضر..من أول كهنة منف وطيبة وحتى كهنة العرب وإسرائيل ومحافل أتباع عيسى..طيب نعمل إيه..ولماذا ينطح العرفاني في جدار قبيلة أبو سفيان بن حرب!؟

  2. ياعمنا ربنا يحفظك ويبارك في حياتك وعمرك يارب حضرتك بتقول إلى محدش يقدر يقوله وفى الحق لا تخاف شء عاشق مصر وترابها ربنا يحفظك ويبارك في صحتك يارب

  3. صديقي المفكر المحترم…من اول الدنيا واحنا علي هالحال..
    التنويريون كانوا دائما أقلية ..وكنت أحلم شخصيا انو وسائل التواصل الجديدة ستساهم في توسيع جماهيريتهم…انت…والقمني ..وابراهيم عيسي لكن أنظمتنا المتخلفة حاصرتكم حتي في الفضاء الإفتراضي…وعملتكم آلة رهيبة تتعقبكم…
    وأعتقد أن المأمأة أشرف كثير من الصمت المتواطىء…
    أشد علي يديك حبيبي المثقف

  4. سيدي
    كلامك اللي من القلب و بوضوح شديد بدون مواربه تجبرني علي احترامك اولا وحبك ثانيا

    وبمأمأ اقول ان هذا الرجل ( اوي) محمد شومان ((( يمثلني)))

    ❤️❤️❤️

  5. فعلا سؤالك ليه النبي اشرف الخلق ..صعب جدا الاجابة عليه ..الافضل لا تسال حتي لا تتعرض لنومة البرش ..لاني عارفها و جربتها مع التعذيب و الكهرباء و الضرب ..

اترك رد

زر الذهاب إلى الأعلى