قضايا المرأة

(١)…


(١)
المنشور الختامي لسلسلة التدوينات اللي بدأت من شهور على هاشتاج #يوميات_مكتبة_تحت_التأسيس 🥳

(٢)
المتطوعين: “انتي تلبسي فورمل يوم الافتتاح”.

(٣)
قلت: “معنديش حاجه رسمي ومفيش وقت اشتري”.
المتطوعين: “خدي من عند هدى عندها كتير”.

(٤)
قلت: “لا هلبس من عندي في طقم أسود وفستان أسود و..”
عبد الله: “يع كلهم وحشين هتلبسي بليزر من عند هدى، أنا بثق في هدى، كل واحد ليه حاجه، انتي اخرك كتابين وكراستين، وهدى ليها في اللبس والمكياج والشياكة يبقى لازم تخرجي من تحت ايدها”.

(٥)
قلت: “أنا عارفه هلبس ايه.. عندي طقم أخضر كدا جديد هلبسه”.
عبد الله: “يادي النيلة الأخضر ورايا ورايا وطبعا عشان احنا فلاحين وبيعبر عننا”.

(٦)
قلت: “أنا رايحه الباجور أعمل بادكير ومانكير ومسكات تشيل عبل الأيام اللي فاتت عن وشي وانتوا كملوا تزين المقر”.
المتطوعين: “فاضل هنا حته سنفرة نعمه تعالي نسفرك بيها أوفر”.

(٧)
قالت: “أنا عندي جيبه وبلوزه خضرا هلبسهم عشان نبقى لابسين زي بعض”.

(٨)
قال: “انتي حلوة كدا يوم الافتتاح خليكي لابسة العباية بردو حشمه طالما هيبقى في قرآن”.

(٩)
قال: “عاملين لينا واجب ضيافة ايه؟”
قلت: “فطير”
قال: “طيب هنأكله امتى؟”
قلت: “زي ما بتخلوا لينا عرض الأراجوز في الآخر عشان التشويق يفضل مكمل فالفطير هيبقى في الآخر بردو”.

(١٠)
قالت: “ألف مبروك يا حبيبتي والافتتاح الجاي يبقى معاكي عريسك وحبيبك وسندك ويوفقك ربنا بيه يا آيات يا بنت فايزة الدعوة تروح لك في يوم مفترج وتبقى مستجابة في يوم الجمعة”.

(١١)
قلت: “ممكن تمدح فيها كمان عشان أنفش ريشي زي الديك الرومي كمان شويه”.

(١٢)
قالت عابسة: “أنا كنت فاكرة المركز أكبر عشان كدا جبت التلفزيون”.
قلت: “المكان صغير والفكرة كبيرة وانتوا جايين عشان الفكرة وتستحق التغطية بكل شكل”.

(١٣)
قلت: “الفطير دا شكله حلو بلا افتتاح بلا بتاع استني أما أدوق كدا”.

(١٤)
قال: “المش دا خطير”
قلت: “دي جبنة قديمة مش مش ومن زلعة أمي يعني المشروع تحت رعاية الزلعة”

(١٥)
قالت: “كل ما كنتي بتتكلمي الناس كانت بتصلي على النبي وتقول ما شاء الله”

(١٦)
قلت: “محدش يجي يزعق لي أو يتعصب عليا احنا من ٨ الصبح والساعة بقت ١٢ ومحدش فينا روح بيته”

(١٧)
قال: “سيبوا لي الخرطوم أعمل بيه.. أنا ست بيت لهلوبة”.

(١٨)
ماما: “أنا قطعت لك ٣ تينات من الشجرة هدية الافتتاح ومحدش هيأكلهم غيرك”

(١٩)
ماما: “وصيتي ليكي انك متسبيش حلمك ولا مشروعك اللي اتعمل دا نواة كملي عليها ونوروا العقول”.

(٢٠)
قلت: “مجتش الافتتاح يا بابا وأنا زعلانة”.
قال: “انتوا واخدني بالصورة يا بنتي.. أنا تعبان ومش قادر أمشي”.
قلت: “ربنا يشفيك ويعافيك ومن حقك تشاركني في يوم زي دا وتفخر بجودة إنتاجك”.
قال مبتسما: “لك الحق أن تفخرا”.

(٢١)
الموظفة الحيزبونة: “شحن الكهربا خلص تعالي اشحني”.

(٢٢)
نفس الحيزبونة: “أنا قلت لهم هحضر الافتتاح ولو مجبتوش اللي قلتوا عليه والله لأفضحكوا وأوريكوا”.

(٢٣)
قال: “أنا مبحبش شغل الحزب الوطني دا بس هسكت عشان المركب اللي له ريسين بتغرق”.

(٢٤)
قال: “لازم البنت يتكتب اسمها على بطاقة الدعوة دي وثيقة للتاريخ وحط اسمك كمان عشان أولادك وأحفادك يعرفوا انت عملت ايه”.

(٢٥)
قال غاضبا: “انتي صاحبة الملعب ومش من حق حد يشخط أو يتكلم معاكي بالشكل دا انتي اللي ليكي الحق تتكلمي هنا بس”.

(٢٦)
قالت: “الناس بتوع الفراشه كانوا فرحانين وبيقولوا احنا عمرنا ما شفنا الحاجات دي.. والعيال مش بيروحوا المدارس وجايين هنا بالكوم”.

(٢٧)
قال: “احنا نكتب في الدعوة الآنسة آيات ما دي دعايا بردو”.

(٢٨)
شكر وامتنان لا يكفي لكل اللي ساعدني وكان ايديه بايدي في كل حاجه ولكل اللي سهل عليا حاجات: “عبد الله عزت/ عبد السميع طارق/ سلمى حسين/ يارا سعد/ هند قنديل/ أبلة إيمان زهران/ أبلة رضا حجازي/ نسرين عبد الستار/ ندى علام/ أحمد/ سارة عبد الدايم/ إيمان أبو العزم/ عم عماد/ علي نصار/ عمي صبحي خاطر/ عم عبد الواحد/ آية طارق/ آمال فهمي/ شيماء السعيد/ إسراء حشيش/ أحمد محمد/ أحمد الشاذلي/ آية أشرف/ سلمى أشرف/ مشيرة عبد المولى/ إنعام رمضان/ مي رمضان/ رحمة وهادي وصلاح هيثم/ مريم محمد” وجايز يكون وقع مني أسماء بشكل عرضي فمحدش يزعل.

(٢٩)
الحمد لله.






يمكنك دعم الموقع من هنا
مؤسسة ندى لحماية الفتيات

آيات عبد الدايم (AyAt Hassan)

مَا وَدَّعَكَ رَبُّكَ وَمَا قَلَى

اترك رد

زر الذهاب إلى الأعلى