يا عبد الملك الحوثي،…

يا عبد الملك الحوثي،
عاصفة الحزم هذي عبارة عن حرب. آه والله. تصور؟ في ناس يتحاربوا كذا.

مالك تئن قطعت لي قلبي، ورجعت زي الجعنان اللي كل ما صفعوه في الشارع روح يسفخ ابنه ويشوت بنته.
وتصيح أوقفوا الحرب ولحد الآن وسطت أكثر من دولة. محسسني إنك ما تعرفش الحروب وإن جماعتك رابطة عمالية. وكنت تقول إنك لا تقهر وخلاص بكرة رايحين فلسطين وعائدون وإن العالم كله عامل لك حساب. كل العالم يرتعد. وشفنا العالم جالس فوق صعدة وانت اللي ترتعش. يا إخي والله إحراج.
ذكرتني بنكتة سمعتها من عبد الباري طاهر من كم سنة.

كان في واحد هلاس وهجاص وكل يوم يجي وقت التخزينة والقات يمسك معه ويبتدي يرغي: اليوم وانا في الشارع في واحد شاف لي بطريقة ما عجبتنيش رحت سحلته الشارع كله. وكل يوم بطولة وقصة. ويوم بدا يحكي ويقول كنت في السوق اشتري قات وفي واحد دهفني بس وانا مسكته ورزع وصغع ودعس لما ما عاد قدروش يشيلوه من تحتي. وهذي البخشات اللي بوجهي من إيده وأنا خانقه تحتي.
وفي واحد في المقيل قاطعه:
صلي على رسول الله يا حسين إيش من ضربته ودعسته أنا كنت موجود.
قال له حسين: كنت موجود وشفت المضاربة/
قال أيوه.
قال له حسين: رأيت ما اخبثه؟

إحنا محاربين بالفطرة قال عبد الملك. والفطرة هذي ما توصلش لحرض.
ومناورة عسكرية ومجاهدين وتعبئة وعامة كل هذا عشان تروحوا تقتلوا الناس في عدن ولحج. هذا هو جهادك وهذي بطولتك، على المدينة اللي كان الشعراء العرب يهربوا إليها في السبعينات والثمانينات.
عملنا حوار وطني وكتبنا الدستور وانت مصر إن احنا دواعش وتكفيريين وقاعدة. وحول لك الله بمن يرزعك ويقول لك يا مجوس.
قلنا لك بلاش هذي اللعبة وودفت بالهاشميين معاك وحسستهم إن مملكة السماء عادت وأن حروبك هي إرادة الله ونهاية التاريخ. وفجأة حتى أستاذ الجامعة فيهم طلع يتصور وهو شايل البندق في صنعاءويكتب أنا رايح للدواعش في حي الأصبحي. وفشخت السلام الاجتماعي للعمر كله، وعكيت في أخطر القضايا:السلم الأهلي. وكنا نقول لك تعال نسمع من بعض وانت تقول بس احنا مجاهدين. طيب واحنا مين؟
اعمل حزب يا جعنان، وانت تقول الاحزاب مشكلة. طيب والحل؟ التعبئة العامة.
ومن ورطة لورطة.وخلال 11 سنة دخلت عشرة حروب. وآلاف القتلى وشتات وتشرد وضياع وفقر وموت في الهامش.
اعقل يا عبد الملك، نقول لك، وانت تصيح:
لا والله لجد خلج الله الولاية جبل ان يخلج الكون.

هلأ صار لازم تتحمل يا زلمة.

م. غ.

يمكنك دعم الموقع من هنا
مؤسسة ندى لحماية الفتيات