ندى الاهدل | قولوا زمان كنت حامل وعادني صغيرة طلبت من زوجي اروح اسوي تلفزيون اشوف بنت ولا ولد

قولوا زمان كنت حامل وعادني صغيرة طلبت من زوجي اروح اسوي تلفزيون اشوف بنت ولا ولد ، وقلي انه مايشتيش يعرف قال خلينا هكذا مش لازم اعرف ذلحين إذا هي بنت…
جلست هذة الكلمة تحز في نفسي, وايش يعني اذا هي بنت..
ومرة وانا عند اهلي زيارة، قلت لصاحبتي نخرج نمشي ..
وامي وافقت على اساس انه مفيد للولادة وقالت بسرعة لا يتصل زوجش وانتي خارج …
وطبعا رحت المستشفى ، كان الأهلي اللي في المدينة حدة..
وعرفت انها بنت ..
خرجت وانا زعلانة وكنت ابكي طول الطريق فرحانة بها وزعلانه من كلام زوجي…

صاحبتي حبت تسليني قالت نشتري مطبق تعرفني احبه من محل كان في لفة ، جمب محل الصرخة..
قولوا هي راحت تشتري وانا منتظرة لها بعيد شوية بالركن..
شفت الشارع فاضي رفعت اللثمة من الخنقة اللي فيني..
مشت سيارة فخمة ودلع وبسرعة نزلت اللثمة ..
وانهم بيعاكسو..
تلفت حولي اشوف من بيكلم..
وانه بيكلمني..استغربت..
قلت له انت اعمى ،مابتشوفش …!
قصدي انني حامل وتاعبة وبالطو مثل حق جدته مش متخيلة ان حد ممكن يعاكس حامل ..
وانه ضحك وعاده زاد يدي كلام اكثر..
فهمت انه من الناس اللي تحب وتعشق حد يهزئها..
في ناس تحب تتشرشح هكذا طبع، مرض ..
فقلت في نفسي اذن ادعمم منه ..
ومشيت قريب من صاحبتي ..
ومكانه كان يعاكس من بعيد …
كانت الناس قليل في الشارع .. تشوف لا عندي ولاعنده وتبتسم بس..
وانا زاد فوق ضيقي ضيق منهم ومنه ..
المهم اخذنا المطبق مشينا شوية في شارع فرعي ناكله ، وهو كان مختفي مدري وين شلوه الجن…
وفجأة وانه رجع يمشي جمبنا دلا دلا بسيارته…
قالت له صاحبتي يا اخي والله عيب ، مش هكذا..
المرة حامل ومتضايقة مايصلحش ..
وهو قال انا مستعد ابعد ضبحها فديت البيبي..
وخرج يده من السيارة يشتي يلمس بطني وانا كردة فعل رجمته بكيس المطبق بين عيونه…
طبعا ،فتحت جهنم على نفسي…!
وقف السيارة ونزل دهفني لوما طيرني..
وصاحبتي بتصيح تدور حد يغيثنا وان الشارع فاضي.. رجعت مسكينة تعتذر له خصوصا لما شافته معه مسدس..
وتقله خلاص ، خلاص يااخي احنا اسفين..المره حامل لا توجعها..
وهو دعس على يدي بالأرض بكل قوته ويقول هذا يدش اكسرها لش ، وسحب اللثمة ورجمها..
دورت حجر ولا اي شي مالقيتش الا تراب اراجمه به…
كل كلام الدنيا كان مايكفيش انني اقوله …

ما فرع بيننا الا صاحبه اللي نزل أخيرا..وكان يسحبه ويقله خلاص عرفت غلطها خلاص ،،
وانا قلت غلطي انا يازباله ،،!!
قام رجع وقال : وهذا زيد ملطام لوما تعرفي من تراجمي..
وراحوا لهم..

قومتني صاحبتي وهي ترتجف تبكي …
كنت انفض التراب من جلبابي مش مستوعبة..
شفت صاحبتي مفجوعة ، قلت اضحكها قلت لها هيا من هذا…انتي عارفه معاهم حق مايشتوش بنات ..
ما معانا الا المردغة بين التراب ، ولو قلنا لهم حد اذانا بالطريق بيقولوا محد قلش تخرجي…
ناولتني اللثمة وهي كلها تراب وهي تبكي ولا وقف بكاها..

مشينا شوية وانا شهقت قلت وين المطبق ! هيا نرجع..
قالت امشي مشت نفسش, يمين ماعاد اذوقه في حياتي وضحكنا واحنا حالتنا حالة ونقلد صوت الرجال المشبوج مثل الثور ..

جلسنا نفكر هل نكلم احد ،تذكرنا ان اخوانها بيرجعوا يمنعوها من الخرجة ، وتحصل معها مشكلة ..
وانا يله اخرج يوم بالسنة ولاعند اهلي بس..
ولو احد عرف انني خرجت من بيت اهلي مصيبة ثانية..
رجع سكتنا وخلاص…وجلسنا مقهورات من الموقف ،
وزعلت على صاحبتي لانها كانت تبكي بحرقة ،،

كنا صغار مانعرفش نتصرف..
وخفنا تقع مشاكل ويقولوا احنا السبب فيها ..
هذا الموقف يرجع لي كلما سمعت عن معاكسة…
واليوم حبيت اشاركه..يمكن يفيد احد او يلهم احد ..او يساعد احد …وتعرفوا انه بسببكم بنسكت…
وبسببكم بنات كثير بتسكت…
مش مهم كيف ممكن تلبس البنت….
ولا مهم كيف شكلها …
لأني تعمدت اجيب قصة انا متأكدة ان في كثير مثلي عاشوها..
لما تبرر للمعاكسة ان البنات لازم يلبسين ويتغطين..
فأنت تبرر لطبيعة المعاكس البذيئة…
انت تبرر للمعاكس قلة تربيته..
لان الطبيعي والجنتل لو يشوف بنت كيفما كانت وايش ما كانت , أكثر شي ممكن يعمله انه يبتسم لها او يرجم كلمة من بعيد…
لكن ابدا مايفكرش يلاحقها…
مايفكرش يقرب منها..
اويكلمها بكلام معيب او يفكر يلمسها…
فيه كبرياء حقيقي…
مش كبرياء مزيف ومفتعل مثل الجاهل اللي هنجم بسيارة ابوه ، ونزل يدهف واحدة حامل ويلطمها لانها رجمته بعلاقية والسبب هو بأفعاله وتصرفاته وقله رجولته..وفي منه عينات كثيرة جدا …
المهم ، ذكرت أسوأ تجربة مرت في حياتي ..ومرارتها كانت اوجع من الولادة نفسها ،،????
وعدمني المطبق،، ????

قصة واقعية للصديقة الجميلة
@cathren.queen.5

تبا لمجتمع القطيع الي يحرض على النساء والفتيات ويدافع على امراض النفوس الحقيرة ويشاهد هذه المواقف ولا يملك ضمير وانسانية وقيم واخلاق