من يوم مادخلت الفيس وأنا محسود على أصدقائى، والأعداء لما…

من يوم مادخلت الفيس وأنا محسود على أصدقائى، والأعداء لما بيخشوا ف صراع معايا بيهاجموا الأصدقاء أكتر من هجومهم عليا، لأنهم شايفين إنى مسنود عليهم وهما بيدافعوا عنى ضد الجميع أيا كان مين.
كم التهنئة بعيد ميلادى ع الصفحة والخاص والفون كان غير عادى، خصوصا إنى السنة اللى فاتت يوم 6 أكتوبر كنت ف العناية المركزة، والسنة اللى قبلها كنت فى المعتقل، وتقريبا كنت نسيت هذا الطوفان من الحب اللى بيخلينى دوما حاسس إنى مقصر فى حقهم .
الطريف إن الساعة 12 بالليل امبارح جالى بعض الأصدقاء وعاملين حفلة مفاجأة، وجايبين معاهم التورتة والجاتوه والمشاريب، وعايز بس أقولهم إنى مادقتش منها حاجة لأنهم باسم الصليب لحسوها وسابوا الأطباق والكبايات عشان أنضفها.
الأغرب إنى كنت وسط 35 إخوانى وسلفى وخلايا تفجيرية وأتباع دواعش العراق، وعارفين إنى علمانى وعلمانى دى يعنى كافر خصوصا إنى بصلى وانا قاعد ومن غير وضوء وأحيانا عكس القبلة، وكمان بشرب سجاير، يعنى 34 واحد الإغتيال عندهم زى شكة الدبوس، ويوم 5 أكتوبر الساعة 12 بالليل لقيتهم طفوا النور- ودى مشكلة لأن الزرار من برة- وداخلين عليا يغنوا أغنية عيد الميلاد- بالإنجليزى- ومعاهم قطعة ” كب كيك” وفيها شمعة، وأستضفت العنبر كله ع البرش بتاعى، والكل بيهنى بحرارة، وأكلت الكيكة وصبحى اللى معايا دة كان مخبى لى دكر بط كلناه لوحدينا بعد العنبر مانام………. الواحد شكله هايتحسر على أيام السجن
للأصدقاء اللى بيغمرونى بكرمهم ودفء حبهم خصوصا فى الأوقات الصعبة، ربنا يخليكو ليا ومايحرمنيش منكم……………متشكر جدا.

يمكنك دعم الموقع من هنا
مؤسسة ندى لحماية الفتيات