#صورة_وسالفة
ام نور
يوم امس كنت اتصفح الصور ووصلت اكثر صورة مؤثرة عندي، واريد احجيلكم عنها
تعرف من تكون مؤمن اكو شي مستحيل يصير؟؟
بس انت تشوفه صاير وتبقى عايش على أمله ؟؟
الناس اللي حواليك.. اللي تتعامل بالمنطق والمعقول تشوفك متوهم.. وتشوفك مسكين.. لأن أمنيتك المستحيلة كلشي بالواقع ضد تحقيقها وضد فكرة العمل عليها حتى!!!
#القصةحقيقية صارت مع ام نور
ممكن جداً يكون عنوانها الأمل العظيم اللي عاشت عليه أوقات صعبة..وهو فعلاً النور اللي يلوح بنهاية النفق الحالك الظلام ونبقى نتأمله وننتظره دون أي وقائع تشير إلى إمكانية حدوثه.
آني بعد ما طلعت من العراق وحدي برحلة هروب كان إلها هواااي أسباب مصيرية((حياه وموت)) وعذراً لأن تفاصيلها صعب تنكتب..
لذلك أكتفي بالقول((غصباً عني)) اضطريت اترك أطفالي اللي هم بعمر مو صغار جدا.. بس بعد نقاش مع والدي
گال.. "خلي أولادك يمي وروحي بابا واكيد ماراح تطولين وتسحبيهم"
وهو هذا الخطأ اللي وگعت بيه وكان من السذاجة أن أتخيل موضوع الهجرة واللجوء سهل بالعكس كان النقيض وعشت تجربة يمكن زادتني قوة وعلمتني يعني شنو فراق الأولاد وشنو ممكن يسوي بالروح وشلون يحفر بير من الشعور بالذنب داخل گلبك وتبقى تحس إنت أسوأ إنسان على وجه الأرض لأن خذلت أطفالك????
كانت سنة 2016 وصلت لسويسرا منتصفها تماماً وهنا تفاجأت بصعوبة الإجراءات، بلد مليان جنسيات مختلفة وناس جاية تدور أمان تدور حياة بسيطة تريد تشتغل وتعيش وتربي أولادها ميريدون شي أكثر..
عشت أيام كلش صعبة بكمب اللاجئين، كنت كلما أختنگ على جهالي أتواصل ويه البنات الأريتيريات والكرواتيات والإيرانيات شريكاتي بالغرفة لأنهم كانوا زغار بالعمر ومحتاجين أحد أكبر منهم بس يسمعهم..
اللغة بمثل هالظروف متكون عائق..آني كنت احجي عربي وانگليزي وهم يحجون لغاتهم الأم وشوية انگليزي.
بس رغم ذلك كنا نفهم على بعض ونگدر نوصل أفكارنه بشكل كامل وكانت هاي راحتي الوقتية لأن سرعان ما ترجعني الكآبة للدرك الأسفل من الحزن بمجرد ما إبني عمار يخابرني أو يكتبلي( ماما آني أحبچ إنتي أحسن أم بالعالم شوكت تاخذيني؟☹️)
عمار كان الكائن الحي اللي دمر نفسيتي بحنينه وشوقه ، الطفل عايش ويه بيت جده ( أهلي) وابوه قريب عليه واخوانه لكن هو ما يشعر بالتوازن ويبقى يريد أمه غريزياً ويعبر عن حاجته إلي بكلام يذبحني وكنت يومية أسد التلفون وأركض للغابة بعيد عن العيون أغرگ بالبچي .
نور كانت ماخذة دوري وكان عمرها وقتها 17سنة وكانت ايضاً تمر بمشاكل قاهرة من نوع آخر وحسيت الحمل صار ثگيل وبنتي تعبت وتأذت جدا وآني عديت فوگ السنة ونص وماعندي إقامة ولا إلي حق أسوي لم شمل إلها ولأخوها والمصيبة إذا عبرت ال١٨ وآني ماعندي أوراق ماراح أگدر أسويلها لم شمل أبداً لأن هذا ضد قانون سويسرا ..
وتخيلوا حجم الضغط النفسي والمعاناة خصوصاً آني مستحيل أخلي بنتي تطلع تهريب هي وأخوها ولا يعبرون البحر كان هذا كله يصب في صعوبة الموقف وآني عايشة بنار الإنتظار والإحساس بالذنب كأم..
إجه الوقت اللي لازم أطلع بيه بشقة خارج الكمب وإختاريت شقة بيها غرفتين وصديقتي السويسرية اللي ساعدتني ألگى الشقة سألتني ليش غرفتين؟ إنتي وحدچ؟ جاوبتها هاي غرفة لعمار!!!
إنصدمت وحسيت بنظراتها أنها تعتقد آني لو تخبلت لو دا أهلوس ما علقت بس گالتلي( لازم تراجعين طبيبج النفسي إنتي تعبانة)
مو هنا المشكلة المشكلة گمت أطلع وأشتري ملاعيب لعمار
أشياء يحبها وأحطهن بالغرفة وأحب أصور شقتي وادز التصوير لأهلي ولأصدقائي واگًوللهم هاي غرفة عمار!
على هالحال من الهوس بالفكرة والحزن والسعي عشت سنتين ونص خارج العالم بفقاعة عازلتني تماماً
سعيت ورحت لكل منظمات حقوق الإنسان حتى اوصل لأي خيط يساعدني اجيبهم ما حصلت شي
سافرت لكل مدن سويسرا وكل الناس اليشتغلون صاروا يعرفوني انت رايح بس تريد أمل والقسوة من يگولولك
اسف انت دتحجي شي خيالي !!!
نور عبرت ال١٨ وفقدت الأمل أن يشملها لم شمل في حال اخذت أوراق وظروفها بدأت تزداد سوءا يوم ورة يوم
حزن و يأس صرت أرجع أنام بغرفة عمار حاضنة ألعابة وانام…
بيوم من الأيام نور تعرضت لموقف وخابرتني تبجي بهستيرية طفح الكيل خلص صبري وقدرتي على التحمل إنهيار عصبي والإسعاف نقلوني للطوارئ وفقدت القدرة على الكلام لمدة يومين..
صديق سويسري عنده منظمة سمع واجاني بزيارة هو وزوجته وكلش تألموا گلي صيري قوية اليوم راح أحاول محاولة يائسة لخاطرج وراح أطلب فيزا إنسانية لنور وعمار ولو ما أوعدج ابد????
محچيت ومعلقت ..
بعد ٣ ايام طلعت من المستشفى وچنت بالشارع راجعة دگ عليه تلفون نفس الصديق مايكل!!!
مايكل: فاتن حصلنه الفيزا السويسرية لنور وعمار
آني: إحساسي ما أگدر اكتبه شي مينوصف وراح يكون أي وصف قليل بحقه..
عمار ونور سوة بفيزا وحدة؟؟
عمار ونور جاييني؟؟، عمار ونور بعد ٣ سنين فراگ راح أشمهم وأحضنهم وينامون بحضني؟؟
بالضبط بعد اسبوعين مايكل سافر لتركيا حتى يجيب نور وعمار بنفسه منعاً لأي مشاكل بالإجراءات..
كنت أگول ياريت عمار يجي ونور اعتبره حلم من الأحلام المستحيلة وتاليها إثنينهم يجون سوة ، بالطيارة وبكل سهولة..
هو هذا اللي تسمى إحساسنه بالأشياء لو ولعنه بيها هو اللي يحققها؟ ؟؟
هذا اللقاء بعد ٣ سنين ونص، نزلت من الطيارة بمطار زيورخ
لكيت كروب ١١ شخص ينتظرونا من كل انحاء سويسرا
٢ مصورين محترفين فيديو وصور، اصدقاء، جيران،
بس احنا جنا بعالمنا الخاص ❤
وكل شي قبل هاي اللحظة لا يُذكر♥️
حبيت انقل الكم الظروف اللي تخربط حياه انسان بلحظه وتخرب حياته وفقدان اعز ماتملك بسبب امور تافهة
#حقوق_المرأةالعراقية
#IWR
#Sara
