لو انتي بنت أو ست في مجتمعنا فإنتي أكيد هتلاقي نفسك في البوست ده.
وأكيد هتكوني مريتي على الأقل بحاجة أو اتنين من اللي هنقولهم، وده لأنك من أول ما بتتولدي ويكتشفوا إنك بنت بيبدأ المجتمع والناس حواليكي وحتى أهلك يحددولك الإطار اللي هتعيشي فيه:
هتعملي ايه في حياتك، هتلعبي ألعاب معينة “بناتي”، تلعبي مع البنات بس، تلبسي لبس معين…
هتكبري شوية .. فهيبدأوا يقولولك إنتي دلوقتي كبيرة، لازم تساعدي في البيت وتعملي شغل البيت وتخدمي أخوكي الولد….
وشوية ويقولوا “البت كبرت ولازم تتجوز”، وتتجوزي فجوزك يقولك “أنا مراتي متخرجش تشتغل” وشوية شوية لو العلاقة منجحتش لأي سبب واتطلقتي، تخرجي للمجتمع اللي فرض عليكي كل ده ويقولولك “مفيش شغل للي في سنك” “بصي أخرك تطريز خياطة أو طبخ انسي تلاقي حاجة عدلة” وكأن الحياة انتهت!
كأن كونك ست لازم يخليكي طول الوقت محاصرة بنوعية مطالب محددة وهي إنك ترضي الكل وتلاحقي على متطلباتهم.
لكن انتي نفسك جايز متكونيش عارفة إمكانياتك وقدراتك. الأصوات اللي حوالينا بتكون عالية وغالبًا بنبدأ نصدقها كجزء من الواقع، لكن في الحقيقة مثلًا إنتي مجربتيش تدرسي مجال بتحبيه وتبدأي شغل فيه عشان تعرفي هتنجحي أو لأ.
الشغل عمره ما كان عيب، لكن العيب هو انك تفضلي محبوسة في شغل مش قادرة تديريه ومش مربح لمجرد انه ماشي مع معايير المجتمع ليكي كست!
مجالات الطبخ والمكياج والخياطة مجالات حلوة جدًا لو انتي بتحبيها. لكن لو مبتحبيهاش مش أخر العالم…
في سوبروومن هدفنا إننا نعرفك إن في حاجات كتير أكبر من الجمل اللي اتقالتلك طول حياتك، والدنيا أكبر من أي حد حاول يوقفك أو يحبطك.
ولأن دايمًا في سكة للسلكان وسط الإحباط … فسوبروومن بتقولك تابعي برنامج نجاة التأهيلي، وتعالي معانا اعرفي ازاى تكتشفي نفسك من جديد .. وازاى تقدري تبدأي “كارير مهني” محترف وحياة جديدة بجد.
علشان تعرفي كل أخبار نجاة تابعينا من خلال الهاشتاجز دي
#نجاة_Nagat
#نجاة_تقول
#اسلكي
#تمكين_اقتصادي_للمرأة
#سوبروومن
#لسه_في_حياتك_نجاة
#Superwomen
يمكنك دعم الموقع من هنا
مؤسسة ندى لحماية الفتيات
