مفكرون

فى برنامج على قناة الاهلى سأل المذيع طه اسماعيل عن سبب…


فى برنامج على قناة الاهلى سأل المذيع طه اسماعيل عن سبب تسميته “الشيخ طه” فقال: انا كنت فى اوضة اللبس باخد جنب واصلى فالكابتن حلمى ابو المعاطى (كان من نجوم الاهلى فى بداية الخمسينات) بيهزر ويقول لى “بركاتك ياشيخ طه” فاخدها الاستاذ نجيب المستكاوى وهو اللى شهرها… انتهى كلام طه اسماعيل..
ماذا نستخلص من كلامه؟؟ انه لم يكن هناك اى لاعب آخر يصلى فى اوضه اللبس لانها ” ماحبكتش قوى قوى يعنى يا سيدى” ولا داعى للتظاهر بالتدين امام زملائه.. وكانت هذه طبيعة اللاعبين بل وطبيعة الشعب المصرى كله قبل ان يتسيد التدين الظاهرى الزائف ويهيمن الهوس الدينى والمزايدات الدينية على الناس… ولو كان هناك لاعب واحد آخر بيصلى فى اوضة اللبس قبل طه اسماعيل كان حلمى ابو المعاطى ابو المعاطى (او غيره) قال له “ياشيخ فلان” قبل ما يقولها لطه اسماعيل..
احيانا تمر علينا حقائق لاننا لا ندقق فى الكلام.. وكلام طه اسماعيل قد يمر ببساطة على الكثيرين.. لكن لو دققنا فيه فان معناه بوضوح انه لم يكن هناك لاعب واحد فى الاهلى( ولا فى غيره) يفترش الارض ويصلى امام جميع زملائه… كنا عايشين حياة عادية.. الصلاة فى الجامع او فى المنزل.. اما الجهر بها فى غرفة ملابس لاعبى كرة القدم فده مكانش موحود خالص وكان “استثناء” .. وقد قلت قبل هذا نقلا عن واحد من اقرب اقرب اصدقاء طه اسماعيل فى فترة الطفولة والشباب ان طه اسماعيل اضطر ان يتخلى عن امرين ليكون لاعب كرة كبير.. اولا : انتماؤه للاخوان المسلمين والثانى كلية الهندسة التى كانت اوراقه قد قبلت بها فعلا

يمكنك دعم الموقع من هنا
مؤسسة ندى لحماية الفتيات

مقالات ذات صلة

‫26 تعليقات

  1. ملحوظه هامه جدا جدا فعلاً..
    متي صليت فأدخل مخدعك ؛ صل لأبيك الذي في السموات ؛ و أبوك الذي في السموات يجازيك علانية..
    للأسف التدين المظهري هو سيد الموقف

  2. هههههه ده الى انتا فهمته .او ده الى انتا عايز تفهمه .بس هيا حبكت والصلاه فى اى مكان واحنا مخلوقين للعباده واى حاجه غير كدا تقصير .انا هقولك حاجه حلوه متقول انك مش مسلم وخلاص ايه مشكلتك

  3. مين قال أن للصلاة مكانا محددا ألا تعلم أن الأرض جعلت لنا مسجدا وطهورا يعني نادي أو شارع أو مدرسة أو أي كان المكان وحان وقت الصلاة على المكلف عليه بقيامها إن استطاع والصلاة ليست سرية حتى يتوارى المصلي عن عيون الناس
    وبخصوص الموقف المذكور فلم لم تفكر بأن زملاء الشيخ طه قد سبقوه بالصلاة مثلا ام أن هناك من صرح بأن الآخرين لم يعرفوا الصلاة والسجود إلا مؤخرا!

  4. استاذ شريف الجيل بتاعكم حضر و عاصر تحولات جوهرية في فترة كان كل الكوكب بيغلي و يتغير ، و بدأ انحسار الشكل الطبيعي للمجتمع من لبس معين يتسم بالتمدين و سلوكيات فيها رقي مفيهاش اي درجة من درجات الكبت للنقيض تماما. جيل حضرتك هو اللي عاش و شاف بالظبط اللقطة دي تمت ازاي و انها بدات بشكل سياسي بحت و توجه مقصود تااام. لحد ما المجتمع سيطر عليه patterns byمعينة جدا
    الشكل الاسلامي هو ده الصح و المفضل ، و اي اشكال اخرى هتروح جهنم.و علي فكرة هتلاحظ ان ده علي صعيدين الدوله ، الصعيد المسلم و الاخر المسيحي، و ده مقصود، عشان تخلق سبب للتشبث بالراي و فرض وجهة النظر و التشدق بالافضلية و ده تحديدا اللي هيبقي منفذ الخلاف المناسب و القوى اللي يحقق سيطرة للسلطة. و يمكنها تمكين كامل. الدين اساسه المعامله و الخلق الحسن و احترام الاخر و ده بشكل تلقائى هيشمل احترام المجتمع في الظهور باللبس المناسب لتوقير هذا المجتمع. ده بدون فرض قيود او سيطرة

  5. أنا شفت واحد من شهر تقريبا نزل وصلي فالشارع…مع انة كان ممكن يدخل center كان موجود جمبة و في مصلي…مفهمتش لية نزل من العربية و يصلي فالشارع

  6. والللى زاد لما بيجيبوا جون ..ال ايه ؟؟ !!! بيسجدوا ..دى سجدة ممجوجة لانها تماثل السجود فى وقت الجاهلية قبل الاسلام ..ولا ننسى ابو تريكة والمحترم حسن شحاتة الللى اخترع حكاية السجود ده ..على اى حال ربنا مطلع على ما يخفى ..وربنا يهدى .

  7. الحقيقي الملفت للنظر ان الشيخ طه الوحيد من الاسلاميين اللي بيتسم بالذوق والأدب و المناقشة الجيده من غير تعصب
    و ده يدل انه حب ربنا مالي قلبه مش منظره

  8. هو عرض واستعراض علي الملئ وكأنه هو الوحيد الصالح والمميز عن الجميع اللي عايز يتعبد لله عن حق وصدق يكون في بيته او في صلاه الجمعه في المسجد انا افتراش الجرايد في اي مكان فهو ايصال رساله بانه مقرب لله ولاعلاقه لذلك بقربه من ان الله

  9. أولا كل سنة وحضرتك طيب أ. شريف… ثانيا لنفترض أن لاعبا آخر كان في نفس الوقت يختلي في زاوية أخرى من نفس الغرفة باحدى معجباته ويتبادلان الحديث علنا فهل كان هذا سيكون سببا في إتهام هذا اللاعب الآخر بالتحرش ببنات النادي أو إدعاء الرومانسية… والسؤال الأهم هل مثل هذا الفعل سيكون مصدر ضيق نفسي كما هو الحال مع الجهر بالصلاة في مكان عام؟!! أم سنراه مظهرا من مظاهر التحضر و الحرية الشخصية؟!

  10. والله انا لسه كنت حقول إنه اكيد اخواني لأنهم بيحبوا يظهروا تدينهم الكاذب علشان يبينوا للناس ان هما اللي بيعرفوا الدين
    لقيت حضرتك بتقول إنه ساب الاخوان
    لكن من الواضح ان تربيتهم ليه فضلت مأثره عليه حتى لو سابهم ظاهريا

  11. “إن الصلاة كانت على المؤمنين كتابآ موقوتآ…”
    يعنى الفرض محدد من قبل الله بوقت معين يصلى فيه مش أنا ولا حضرتك ولا س ولا ص اللى بيحدد وقت الصلاة ..
    وخلينى أمشى مع إستنتاج حضرتك إنه محدش كان بيعمل كدة غيره فـ ده مش معناه خالص إنه هو غلط والباقى صح .. بالعكس الصح هيفضل هو الصح ولو محدش عمله والغلط هيفضل غلط ولو كل الناس عملوه..
    إنتوا عقلكم شت أقسم بالله وبقى عندكم زعر من أى حاجة تخص الدين وده بقى مفهوم أوى لدرجة إنه بقى يجيب نتايج عكس التارجت وبيخلى الناس تتمسك بدينها أكتر بإذن الله ..
    يعنى لو واحد مش بيصلى أصلآ هيكون الكلام واخد إتجاه دى حرية شخصية وعلاقة العبد بربه ومحدش له إنه يتدخل، لكن واحد بيصلى نسيبه فى حاله ؟ لأ إزاى لازم نتدخل ونتناسى كلامنا عن حرية الآخرين وعدم التدخل فى شؤونهم وننهاه عن اللى بيعمله ونحسسه إنه وحيد منبوذ ..
    ومش قادرة أفهم ليه حضرتك بتحاول تربط بين إقامة الإنسان لشعائر دينه وبين إنتمائه لفصيل سياسى معين وكأن كل اللى بيصلى إخوان وعشان الواحد يبعد عن نفسه شبهة الإنتماء للإخوان فيبقى مضطر إنه يترك صلاته مثلآ !!!

  12. للأسف الان يترك ألموظفون عملهم بحجه صلاه الظهر مستهلكبن الوقت و مضيعين مصلحه الناس وكذلك يعتمدوا افتراش الشوارع في صلاه الجمعه كل ده لصبغ المجتمع بصبغتهم و حتى يقولوا ان البلد بلدهم

  13. انتوا كمان زعلانين من الصلاة؟ …يعنى عايزين تضموا على اسراءيل وتعملوا اسراءيل الكبرى من النيل والفرات؟ والا عايزين المحتل الفرنسى والا الإنجليزى والا الروماني… والا ده تحضير للمسيخ الدجال …والا ايه حكايتكم اللى مش باين لها اول من اخر ؟!!

  14. كان المصريون يؤدون ما يريدون من فرائض الدين كعلاقة خاصة بين العبد وربه لا تخص أحدا ، ومع المد الاخواني وبعده السلفي تحول أداء الفرائض الى حالة من التباهي خلقت تراتب اجتماعي مبني على ظاهر الامور لا جوهرها

  15. لا حول ولاقوة الا بالله
    هو اللي بيصلي في مكان وكل الناس اللي في المكان مابيصلوش يبقي هو بيمثل وبيتظاهر

    يعني بنفس منطقك أن لو في مكان كل الناس ملتزمة ومحترمه وفي واحد خمورجي وبيحب يسكر وشرب وسط الناس المحترمه هايبقي وقتها بيتظاهر بالسكر والصياعه

    لو في مكان كل اللي فيه محجبين وفي واحده مش محجبه يبقي هي بتتظاهر انها متحرره وضد الدين مثلا

اترك تعليقاً

لن يتم نشر عنوان بريدك الإلكتروني.

زر الذهاب إلى الأعلى