عارفين في كام حالة طلاق في مصر؟
طب عارفين في كام ست تعيسة في حياتها بس مش قادرة تطلب الطلاق؟
طب عارفين في كام مطلقة مخبية طلاقها حتى عن أهلها؟
طب عارفين في كام مطلقة بتفضل تقول انها ارمله؟
تعالو اقولكم ليه كل ده بيحصل:
رغم إن الطلاق نهاية مباحة لجواز مش ناجح، ورغم أنه قرار مايخصش غير الزوجين، ورغم أنهم المفروض يلاقوا الدعم من إلي حواليهم عشان يقدروا يتخطوا ألم التجربة و يتعايشوا مع حياتهم الجديده.
إلا أن الكلام ده بيحصل بس مع الراجل، وفي عز ما الراجل قادر يكمل حياته بكل سهولة وبيلاقي الدعم من كل الي حواليه لأن ( الطلاق مايعبش راجل).
بتكون الست بتدفع تمن الطلاق في كل لحظة في حياتها:
من أول عدم دعم أهلها واعتبارها أنها جابت لهم العار للتحكم في قراراتها الي ممكن يوصل منع نزولها من البيت نهائي.
لبعد صحابها عنها والتعامل معاها على أنها (خرابة بيوت).
لنبذها من المجتمع ورمي كل اللوم عليها والحكم عليها بأنها (فاشلة، مهملة، ما بتعمرش بيت).
والاسوء اتهامها ووصمها في شرفها وأخلاقها لمجرد أنها مطلقة (فامش هاتقدر تحافظ على نفسها بعد الطلاق).
أو حتى أنها مش هتلاقي فرصة ارتباط كويسة (مين هيرضى يتجوز واحدة مطلقة).
ده غير الاستغلال والتحرش الي بتتعرض له يومياً لمجرد أنها مطلقة (فأكيد سهل الوصول ليها وهتموت على أي راجل).
مجتمعنا قاسي جداً على المطلقة، ورغم انتشار الطلاق بس احنا لسه بنحرم الست من حقها في قرار الطلاق وبنوصمها وبنطلق عليها اسوء الأحكام.
وده بيخلي الست ليها حسابات تانيه كتير قبل ماتقدر تاخد خطوة الطلاق أو تعلن عنها…
كتابة: سماء البري
#وصم_المطلقات
#سوبر_وومن
يمكنك دعم الموقع من هنا
مؤسسة ندى لحماية الفتيات
-
-
-
-
-
-
-
-
