قضايا المرأة

بمناسبة ميل الاعتذار عن قبول طلبي لحضور ملتقى التبادل…


بمناسبة ميل الاعتذار عن قبول طلبي لحضور ملتقى التبادل الثقافي اللي جوته منظمه للفاعلين/ العاملين في المجال الثقافي بالمحافظات.. أول مرة اتكلمت عن المشروع اللي عايزة أعمله في القرية عندي كان في جوته سنة ٢٠١٩، في ورشة لكتابة المشروعات، والورشة دي تحديدا كانت أول ورشة اتقبل فيها، وميل القبول فيها كان وقعه غريب عليا، لأن عادة نفس الكلام اللي كتبته في الاستمارة كنت بقدم بيه في حاجات تانية ومكنش بيحصل نصيب، لاحقا لما قابلت المسئولين عن المشروع واتعاملت معاهم عرفت اتقابلت ليه ومن غير ما اسألهم، رحت وكانت أول مرة أبات فيها خارج بيتي وبيت عمي، وكانت القاهرة مقلوبة على خلفية أحداث لا داعي لذكرها 😆

طول أيام الورشة اتعلمت واتفاجئت واتصدمت، تفكير بعض الحضور والعاملين في مجال التنمية والعمل الأهلي كان غريب، بيعترفوا بعادية كدا بالمخالفات اللي بيعملوها سواء بفلوس التمويل أو كسر القانون عشان يمشوا مصالحهم، كنت حاسه وكأني سمكة بهلوان وقعت في حوض قروش، وخلال التدريب طلبت المدربة حد مننا يتكلم عن مشروعه، والقرعة وقعت عندي لأن كنت لسه في مرحلة الفكرة، في حين ان أغلب الحضور عندهم جمعيات ومؤسسات شغاله بالفعل، بدأت الكلام: “المشروع بتاعي صغير وبسيط.. أنا عايزة أعمل مكتبة.. “، ولأني كنت عامله شبه حصر لعدد وطبيعة حضور المواقع الثقافية في محافظة المنوفية، ومن ضمنهم المركز اللي قريتي تابعة ليه، اتكلمت ودعمت كلامي بالأرقام، وشرحت الواقع الثقافي اللي أنا خارجه منه، وهنا الأفاضل بدئوا يقطعوني ويلاحقوني في الكلام: “لا مفيش الكلام دا أكيد في نشاط ثقافي وانتي متعرفيش عنه”/ “مفيش حاجه اسمها مكان مفيهوش نشاط ثقافي” وطبعا طبعا سكتهم لأخر أيام التدريب 🙄😂

نهايته.. الورشة دي خلتني أفكر يا ترى التمويل بيروح فين فعلا؟ والأهم أولويات العاملين في المجال ايه؟ ويا ترى هما دارسين أبعاد وطبيعة المجتمع بشكل حقيقي؟ شغلهم يلبي احتياج ولا مجرد نسخ ولصق؟ طيب يا ترى فساد المجتمع المدني يتم التعامل معاه ازاي؟

#يوميات_مكتبة_تحت_التأسيس

يمكنك دعم الموقع من هنا
مؤسسة ندى لحماية الفتيات

آيات عبد الدايم (AyAt Hassan)

مَا وَدَّعَكَ رَبُّكَ وَمَا قَلَى

اترك رد

زر الذهاب إلى الأعلى