اياد شربجي
خرجت للتو مما يشبه حالة هستيريا … في واحد عميبعتلي (شايفينك شايفينك) شو شايفني كيف؟ (واضح صوتك والصورة بس قرّب عالكاميرا شوي) العمة شلون شايفني؟ وفتحت الفيسبوك ، مؤشر فاتح مباشر بالغلط ، طلع لأ ، فتحت اليوتيوب الواتس آب … كلو … مو مبين شي ، بس هوي تأكدلي إنو عميشوفني عالفيسبوك.
بلش الفار يلعب بعبي ، إنو شلون شايفني يعني ، وكيف ، وشو شاف ، من شوي كنت بالتواليت ، يلعبها كنت عم احكي حديث خاص مع واحد … هدول كلهن شافهن؟ (مو بس انا الكل عميشوفك ..) .. يا فضيحتك يا ابن الشربجي ، مليون واحد ناطرك على غلطة ..السهرة عليي اليوم ، وتعا شيلني اذا فيني رقّع … بيرجع يقلي (تابع تابع … شايفينك) …. العمة تابع كمان ، عميتفرج ومستمتع … !!!
المهم بعد ما ارتفع ضغطي للألف طلع الزلمي متفركش بفيديو لايف كنت عاملو من شهر …. والأخ مفكرو لايف هلأ !!!
وسائل التواصل الاجتماعي لسة بدها تجننا رسمي … !!!
