#فتاة_المنصورة اتكسر لها ضلع و اتنازلت .. و ده العادي في مجتمعات دايماً تهدد الستات و تذلهم و تنبش وراهم عشان يتنازلوا عن حقوقهم و يخرسوا …
أقدر جداً أتفهَّم موقفها لأني زيها .. رغم كل قوتي دي ياما اتكسرلي ضلوع و سكتت و اتنازلت عن حقوق ليا غصب عني .. لأني ببساطة ماكنتش أملك امكانيات المطالبة بالحق ده .. و لا عندي القدرة على مواجهة اللي اغتصبوه ..و لا في قانون ناجز يجيب لي حقي بدون ما يستنزف وقتي و جهدي و فلوسي و أعصابي .. فالتنازل فعلاً أوقات كتير بيكون إجبار مش اختيار ..
كل واحدة فينا عارفة إنها عمرها ما هتسلم في المجتمع ده إلا لما تتنازل عن أي حاجة عشان ترضي أي حد له سلطة عليها .. و أول ماترفعي راية العصيان و تتمردي و صوتك يعلى .. يبتدي فوراً تطبيق العقوبات .. و كل واحدة بقى و قدرة احتمالها .. و مدى احتمالها .. و إمكانية احتمالها ..!
و على رأي ست بسيطة قابلتها مرة في الفيوم و كانت حامل .. لاقيتها بتدعي إنها ماتخلفش بنات ابداً .. و إنها لو كانت حامل في بنت تموت ..
و لما اعترضت و قولت لها ليه القسوة دي يا ست .. قالت لي قسوة إيه يا دكتورة .. الواحدة فينا من يوم مابتتولد لحد ما بتموت و هما كل يوم يكسروا لها ضلع .. و يقولوا بكرة يطلع لها ٢٤ .. و الحقيقة إن مافيش حاجة بتطلع .. و بنعيش طول عمرنا مكسورين ..!
كسر رقبة أي حد اتسبب في كسرة واحدة ست ..!
