المجتمع بيميل لتصديق الرجال (ما عم أحكي عن الصحافة المرموقة والصحفيين والنشطاء بالدول المتقدمة)، هي حقيقة، فيك تطم راسك بالرمل وتعمل حالك مو شايفا، والحالة الوحيدة اللي بيتم فيها تصديق المرأة هيي أنو تكون كتير كويسة وكتير ملاك بريء ويكون الرجل كتير سيء وواضح هالشي عليه..وهي الشروط ما بتنحط على التعامل مع الرجال، الرجل فيه يكون أقل سوء من المرأة شوي حتى يتم تصديقه والتطبيل اله، أو مجرد ما تكون المرأة سيئة ولو شوي فتلقائياً بيتم دعم الرجل، وما فيه داعي قلكن تعوا نطلع على التاريخ والقصص المشهورة، اطلعوا على حياتكن ومحيطكن وقصص بنات خالاتكن والسلايف والكنة وابن الإحمى، كيف بكل المشاكل المرأة هيي السبب وهيي اللي بيتم جلدها وتحميلها المسؤولية، لانه متل ما ذكرت، شرّ المرأة بأي قصة وبأي حكاية بينضرب ب 100.
أنا ما دعمت آمبر هيرد ولا بطيقا حتى (لا قبل المحاكمة ولا بعد المحاكمة)، الشي اللي بدي الناس تشوفه هو التشريط اللي بينحط على المرأة لتتصدق أو تستحق التعاطف، العدسات والمكبرات والأضواء اللي بتنحط على زلاتها.
آمبر غلطت وكذبت وتسلقت على القضية، ولكن لهلا من وجهة نظري ردة الفعل عليها مبالغ فيها..
مارلون براندو اغتصب ممثلة معه أثناء مشهد من فيلم بالاتفاق مع المخرج، ولهلا نادراً ما تذكر هالحادثة، وحتى أنا ما عرفتا لكم شهر، لأنه مارلون براندو بيضل العراب الممثل الخارق الرائع القديس بموهبته..
وهاد ما بيزيدني إلا قناعة أنو غلط المرأة بينضرب ب 100، وغلط الرجل بيتم ترقيعه أو تجاهله أو نسيانه.
عدم الاعتراف بما سبق بينم عن شغلتين: ذكورية، أو رواسب ذكورية بأحسن الأحوال.
#ملاحظة: أنا ريم محمود، الآدمن الحالية الوحيدة لهالصفحة (الباب مفتوح لانضمام أي حدا جدّي) عمري 27 سنة، لا بدعي إني بملك الحقيقة المطلقة، ولا ذكرت ولا مرة إني بمثل النسوية بسوريا، ولا الناطقة باسمها، وبتمنى يفهم الجميع أنو الحركة النسوية أكبر بكتير من أنه يمثلها شخص أو صفحة أو مجموعة. الموضوع أكبر من هيك.
#ريم_محمود
#نسويات_سوريات
يمكنك دعم الموقع من هنا
مؤسسة ندى لحماية الفتيات
