على مدار تاريخها، المرأة المصرية بتقف بشجاعة وثبات كمعيلة لعائلاتها. ورغم التحديات الكبيرة اللي بتواجهها، لكنها لا تتوانى عن مواصلة العمل والسعي لتوفير لقمة العيش لأسرتها. المرأة المعيلة في مصر بتعاني من مشاكل وتحديات كتيرة بتخلي من الصعب عليها تحقيق أهدافها وتحسين أوضاعها واحنا قررنا في حملتنا نتكلم عن التحديات دي.
ودورها في مصر من أهم الأدوار اللي بتأثر بشكل مباشر على المجتمع؛ فمصر فيها أكتر من 12 مليون امرأة معيلة، وحوالي 30% من الأسر المعيل الأساسي ليها نساء، ونسبة المرأة المعيلة تحت خط الفقر 26,3%، الأرقام دي خطيرة وتخلينا لازم ننتبه لدور السيدات دول علينا كمجتمع وأشخاص.
ده غير أنها بتواجه تحديات كثيرة في الحصول على فرص عمل مناسبة ومنتظمة، وبالذات في القطاعات الأكتر تأثرًا بالفقر والتهميش زي الزراعة والصناعات الخفيفة. وغير كده، بتواجه المرأة المعيلة تحديات تانية زي عدم توفر الرعاية الصحية المناسبة والتعليم والتدريب الكويس، وده بيأثر سلبًا على حياتها وحياة عائلتها.
المرأة المعيلة في مصر بتقابل صعوبات في توفير احتياجات أسرتها، واللي بتشمل التعليم والرعاية الصحية والسكن والغذاء والملابس. وبسبب ضعف الدعم الحكومي والانحياز الاجتماعي، المشاكل دي بتبقى صعبة ومعقدة اكتر.
عشان كده هدف حملتنا هو تسليط الضوء على واقع المرأة المعيلة في مصر، والتحديات اللي بتواجهها، وتشجيع المجتمع على دعمها ومساندتها. المرأة المعيلة مش لازم تواجه الصعوبات والمشاكل دي وحدها، وواجب علينا كلنا نشتغل لتوفير بيئة عمل مناسبة ودعم احتياجاتها الأساسية وضمان حقوقها كإنسان.
عشان كده بندعوكم تتابعوا حملتنا والكلام عن المرأة المعيلة في مصر. خلونا نجمع جهودنا ونشتغل كلنا على تحسين وضعها ومساعدتها على تحقيق أحلامها وطموحاتها.
#المرأة_المعيلة_المهمشة
#دعم_المرأة_المعيلة_في_مصر
#من_أجل_مواطنة_كاملة_للنساء
#نحو_حياة_أفضل_للنساء
#النساء_المهمشات
#التمكين_الاقتصادي_هو_الحل
#لولا_شغل_أمي
كتابة: محمد طارق
يمكنك دعم الموقع من هنا
مؤسسة ندى لحماية الفتيات
