إمبارح صديقة فاضلة بتسألنى سؤال مهذب هاقول أنا فهمته إزاى وارد عليه هنا، بتسألنى هل التمن اللى بتدفعه من صحتك وفلوسك وأكيد خسارتك للناس اللى حواليك، وكمان السجن والبهدلة اللى شفتها، هل تأثيرك فى المجتمع يعادل الضريبة اللى بتدفعها؟
الحقيقة وبدون إدعاء أنا عارف إن تأثيرى فى المجتمع أقل من تأثير شعبان عبد الرحيم، أو مثقف من المهرجين النجوم، زى ماكان شكوكو أكثر تأثيرا من عباس العقاد واتحداه يمشوا مع بعض ف الشارع والناس هاتقول مين دة اللى مع شكوكو؟.!!!
كنت ف مناقشة مع دكتورة شهيرة عن مدى تأثير المثقف، هى شايفة إننا قادرين على إحداث التغيير بتكثيف كتاباتنا، وانا بقول لها مع الإحترام لدورى كمثقف، ولكن جهود كل مثقفى مصر على مدى ألف سنة لا تعادل تأثير قرار واحد من الفرعون، ولكن………. عشان الفرعون يصدر القرار دة، لازم كتيبة المثقفين تفضل تحرت ف البحر ألف سنة وتعمل تأثير تراكمى.
وهنا دخل علينا مولانا القمنى رحمة الله عليه وقال لها شومان طبعا على حق، هو أنا أقدر كمثقف أفرض تدريس كتب فرج فودة على الثانوى؟ أو كتب نصر حامد أبو زيد على طلاب الجامعة؟ يقدر كل مثقفى مصر يقفلوا الأزهر أو يمنعوا حتى الآدان المزعج فى الميكروفونات؟
اللى احنا بنعمله إننا بنهيئ الجو العام للفكر العقلانى ونحاول نلقى الضوء على التاريخ الحقيقى بعيدا عن الثقافة الزائفة، ولو نجحنا فى تغيير فكر فرد واحد يبقى فيه أمل، ولكن كل أملنا متوقف على الفرعون التنويرى مش المثقف الشهيد.
مش معنى إننا مش مؤثرين إننا ننسحب من الساحة ونسيبها للحيوانى والشعراوى، هانموت منكسرين منهزمين وهما مكتسحين الساحة، بس هانموت بشرف ونسيب جيل جديد يفتخر بينا………………..
زى ماطلب منى القمنى إنى أحرق جثته واخد رمادها أرميه من فوق السد العالى، يمكن رماد جثمانه يساهم فى تخصيب وردة أو سنبلة قمح تقدم الخير لمصر، إحنا كمان بنقدم كل مايمكن حتى لو سنبلة فكر عشقا لترابها ولو كان التمن السجن والخراب………….
يمكنك دعم الموقع من هنا
مؤسسة ندى لحماية الفتيات
اكتب بكل قوه ربنا معاك
اكتب بكل سرعه لا نملك ترف تضيع اي لحظه
تأثير كتاباتك واسع المدي ، ولو في جرأة كافية كان يظهر للملأ عظم تأثير كتاباتك وكتابات أمثالك من المثقفين ، لكن للخوف من كهنة الدين وسلطة الأمن مش باين . حتى الحفر في الحجر يوما ما يُقرأ وينتشر .
لأن يهدي بك الله رجلا واحدا خير لك من حمر النعم ، والله يرحم الأستاذ سيد القمني رحمة واسعة.
بصراحه الله ينور عليك وتستمر في رحله التنوير لعل وعسي ينصلح الحال
تحياتي لحضرتك انت ثروه فكريه معلوماتية مثتنيرع