كتّاب

أخويا محمد ربيع وبعض الأصدقاء من مدن القناة اللى علقوا ع…


أخويا محمد ربيع وبعض الأصدقاء من مدن القناة اللى علقوا ع البوست اللى فات…
مدن القناة كانت مستهدفة من الطيران الإسرائيلى قبل ماعبد الناصر يبنى حائط الصواريخ بخدعة كبيرة سنة 1970، وهنا تم تهجير السكان لكل محافظات مصر فى الوحدة المجمعة والمدارس الحكومية، وكنت تلاقى تلات اسر مثلا عايشين مع بعض ف عنبر واحد ويفصل بينهم ملاية سرير، لكن الأثرياء فيهم أجروا شقق فى قريتى، وعاشوا معانا فترة طويلة يمكن لحد سنة 74، ايه حكايتهم معانا؟
الفلاحين زمان قبل الخليج والتليفزيون كانوا بيحسوا بالنقص أدام سكان البندر، واى ست بندرية تبقى شمال، والرجالة حولات، ليه؟ لأنه أولا بيشرب سجاير مكنة، وفيها فلتر بينقى النيكوتين، احنا بنشرب سجاير لف بدون فلتر، وهى دى الرجولة.
ثانيا دة بيلبس قميص وبنطلون وبيقول آه وأيوة، واى راجل يلبس قميص وبنطلون يبقى حول بيورى مؤخرته للرجالة عشان يغتصبوه، مش ساتر نفسة بجلابية، ومالها إيه وإيوة ؟
ثالثا بيستحمى ويحلق دقنه كل يوم، أحنا بنحلق شعرنا ودقننا مرة ف الشهر عند المزين تحت المحطة، هو بقى بينعم دقنه لمين؟ أكيد عشان الرجاله تحبه ف حنكه، يعنى تبوسه ف بؤه، وكتر الحموم بيخلى الرجالة مرخية، معروفة طبعا مش محتاجة كلام.
رابعا بقى وهو الأهم، الناس المتنعمة بتوع البندر اللى بياكلوا بايديهم الإتنين والشيطان طبعا ساكن ف الإيد الشمال، هما والنصارى ربنا خيرهم وخيرنا، تتنعموا فى الدنيا وتخشوا النار؟ ولا تبقوا فقرا فى الدنيا وتخشوا الجنة؟ إحنا إخترنا الجنة ورضا ربنا، وهما بقى إختاروا الدنيا وهانشوفهم ف الآخرة بيتعذبوا ف نار جهنم، واحنا نشفى غلنا منهم.!!!
أهل السويس اللى سكنوا عندنا كانوا من الحولات بتوع البندر، ومكروهين جدا من أهل ابلد، والشيخ أبو الحمد طلع عليهم اسم الملاعين بدل المهاجرين، لأنهم علموا عيالنا ألعاب جديدة عمرنا ماعرفناها، وكمان اخترعوا حاجة اسمها العيش الفينو، كان أبوياعيد- اسمه أبويا عيد- بيبيعه ع الكوبرى الصباع الصغير بتعريفة، والكبير بقرش، والمدور المشبك بستين فضة يعنى تلاتة تعريفة، واحنا بلد فقرانة مش لاقية التعريفة، يقوم العيال واقفين أدامه يشموا الريحة ويتلمظوا عليها، لحد ماييجى عيل يشترى صباع يجروا يخطفوه منه وياكلوه بشراهة أسد بياكل غزالة .
بس برضه فضلنا نكره المهاجرين الملاعين، وماحدش مننا اتعاطف معاهم، لأنهم رغم غربتهم وتهجيرهم كانوا عايشين أنضف مننا وأرقى فكريا واجتماعيا.
محمد ربيع ياخويا، دى وجهة نظرنا ف الملاعين وماتزعلش منها، دة تاريخ لازم نحكيه بصراحة…….




يمكنك دعم الموقع من هنا
مؤسسة ندى لحماية الفتيات

‫24 تعليقات

  1. احييك علي صراحتك
    وانك. ماقولتش البوقيين بتوع اخواتنا ونتكاتف وبتاع
    كمان وضحت بمنتهي الشفافيه
    ان العيب كان عند اهل بلدك
    اللي بيكرهوا الاخر وبيحقدوا عليه لمجرد الاختلاف
    حتي لو كان الاختلاف للاحسن
    ودا بالفعل طبع الفلاحيين
    الناتج عن الجهل والفقر

  2. هنا بنحاول نحكى مقتطفات من تاريخ مصر بعيون مصرية، وبدون مجاملات سخيفة، زى ستاتنا زمان لما كانوا بيكنسوا اأوضة المسافرين ويحطوا الزبالة تحت الكنبة، وتيجى انت تلاقى الأوضة بتلمع، بس هى وسخة زى ماهى بس دارينا الوساخة تحت كنبتنا………….

  3. ايوه .. حصل
    وكان معاكسة البنات بكلام غزل .. عار
    وتضيع فيها رقاب
    وشباب القريه غارو من شباب البندر
    وأما نزلوا الجامعات .. إتوهمو
    انا فاكر مره كنا ماشيين ومعانا واد فلاح مسبسب حب يعمل زي شباب البندر ويعاكس
    طبعا مش عارف يقول .. ياغزال .. ايه القمرده ، …….
    ام راقع كلمة لبنت .. بيقلد
    كان هيضرب بالجزمه بعديها
    قالها .. عايزين نبل الجلده
    وكان يوم طين علي دماغنا كلنا

  4. فعلا وتقريبا بس انا كنت مهجر في مسقط رأس ابي و امي فكانت اكثر حاجه سمعتها أن المهجرين غلوا علينا .المش .يا مهاجرين سنتكم طين هههه هي النغمه السائده آنذاك

  5. مش عارفة افتكرت حد كان بيحكي عن موضوع القميص والبنطلون أنهم كانوا بيتريأوا عليه ويقولوا شوفوا الراجل ماشي مقسوم نصين😂

  6. ممكن يا مولانا تشرح العبارة التاليه
    لماذا يطلق علي اهل المناطق البحريه بالخصوص الاسماعلية والسويس وبورسعيد فقط ميه مالحه ووشوش كالحه
    مع الاعتذار وعلى فكرة هذا الفصيل طلعوا دين أبونا في الجيش .

  7. اروع حاجه فيك يا كبير هو انك تكتب تاريخ الشارع تاريخ الحاره و البشر التعبانه و اظن انه التاريخ الحقيقي للامم اما تاريخ الكتب الذي ندرسه هو تاريخ كريمه المجتمع تاريخ سطحي اغلبه اكاذيب و الحقيقه فيه ضاله ، تحياتي يا كبير

  8. وازيدك من الشعر بيت يامهاجرين سنتكم طين هههههههه بس برضوا للأمانة الريف اهل كرم ومن افضال المهاجرين او مااعرفش من المساؤي انهم خرجوا عن نظام المقايضة وبدء التعامل بالنقد لكن انت اختصرت وعي الشعب المصري في الفرق بين الريف والمدينة بعد الاختلاط المباشر بين ثقافتي شعب واحد في جغرافيا مختلف شعب جزء منه اختلط بالثقافة الغربية عن طريق الاحتلال او السفر للخارج او الاحتكاك بالجاليات الموجودة في هذه المدن وبين شعب لم يخرج عن حدود القرية لا راديو ولا تلفزيون ولا وسيلة ترفيه غير حكاية المصطابة ولعب الحكشة في الليالي القمرية والسهر عند الساقية في الري بالليل وقصص امنا الغولة والعفاريت والجنيية اللي ساكنة الترعة والنميمة شرط اساسي من شروط الريف المصري وأصبح بعد الغزو الوهابي في أنحاء المحروسة وباشكرك انك بتقلب المواجع علينا للاعادة قراءة تاريخنا المعاصر بصراحة المعهود عنك تحياتي

  9. بس انت كنت عايش وسطيهم نص بندري متحضر والنص الثاني ابن بلد ماصل………
    الغرض من التعليق تحكيلنا عن بعض المستملحات للي خزنتها في ذاكرتك المتقدة… زي عندما تلقي السلام أو تصبح عليهم/هن…. سبق أن كتبت بعض الخواطر زي كدة….. المهم مما ياباشا 😝😘😅🙏

  10. إيه الجمال ده ، ايه طعامة سرد الكلمات دى ، إيه الواقع الحقيقى القديم ده ( كأنى أعيشه وبرائحته الان ) كل ماتم ذكره قرأته بالضبط فى عيون اقاربنا وهما بيزورونا من البلد . والله بقول لأولادى أنك أبدع من نجيب محفوظ ( وأنا لاأكذب ابدا على من احبهم )
    يسعد قلبك أستاذنا زى مابتفرح قلوبنا.

  11. فترة هامه فى تاريخ مصر والمصريين
    التهجير وتأثيره على القريه المصريه والبندر
    وماواجه اهل مدن القناة من تنمر وتأثير تلك الفترة على تكوين اليافعين وقتها .. تحياتى وتقديرى لتذكرك وتذكيرنا بجزء مهم من تاريخنا لم يأخذ حقه فى البحث والدراسة

اترك رد

زر الذهاب إلى الأعلى