عندى معلومة شخصية عن رجل الأعمال أحمد بهجت الله يرحمه، عارف…

عندى معلومة شخصية عن رجل الأعمال أحمد بهجت الله يرحمه، عارف طبعا إنه متهم بالفساد، وإنه رجل أمريكا فى مصر، ومتهم إنه شريك جمال مبارك فى الفساد، وإنه إشترى متر الأرض من الدولة بخمس قروش وباعه للبنك ب 120 جنيه، وألف قصة سيئة بتتقال عنه، بس هنا هاحكى عن موقف مش معروف.
فى السبعينات كان أحمد طالب فى كلية الهندسة، وصديق حميم لشاب إسمه إكرام السعودى من قرية جنبنا إسمها السعودية، ويبقى خال أخويا الصغير.
إكرام مسافر أمريكا ياخد الدكتوراه، وابوه يقترح عليه ياخد معاه صديقه أحمد وهو متكفل بيهم هما الإتنين، وبالفعل يسافر أحمد بس هناك يرفض فلوس صديقه إكرام ويشتغل ويصرف على نفسه، ويفضل شايل الجميل لصديقه.
كانت بداية النجاح وهو ف أمريكا إنه إخترع بوصلة بتتحط فى سجادة الصلاة تحدد إتجاه القبلة، ونجح الإختراح دة وحقق مكاسب بالملايين، وفورا راح عمل شركة مع بعض الشباب الأمريكانى، وابتدى المسيرة.
سنة 82 مبارك فى أمريكا وقابل أحمد وقال له خسارة إنك تعيش هنا وتحرمنا من عبقريتك، واتأثر الشاب جدا بكلام الرئيس وفعلا رجع مصر وعمل مجموعة شركات ربما هى الأضخم فى مصر، وتوكيلات، ومدينة كاملة، وقناة تليفزيونية، وتليفزيون جولدى تصنيع مصرى، ونشاط غير عادى خلاه ملياردير فى سنين .
لكن…………………………………
كان مدير أعماله ومدير كل مشاريعه هو الدكتور إكرام السعودى، وكان أحمد بيحبه ويحترمه وعامل له تفويض شامل بالتصرف كما يشاء فى إمبراطوريته المالية، وإكرام ابن ناس وعائلة السعودى عريقة وتقيلة ف العياط، ولحد سنة 2000 مثلا لما كنت قريب من الأحداث، كان إكرام مشغل كتير جدا من شباب العياط عنده، وهو الآمر الناهى فى شغل أحمد بهجت.
عايز أقول إن أحمد بهجت راجل أصيل وبيعرف يرد الجميل للناس، وماليش دعوة بقى بالسيرة التانية، أنا بحكى عن جانب مجهول من حياة الرجل بيوضح نبله، ونبل د إكرام من قبله…….

يمكنك دعم الموقع من هنا
مؤسسة ندى لحماية الفتيات