– ماتزعلش يا صديقي ..
أنت جزمتك فوق دماغهم كُلهم وبرقبة أنضف واحد فيهم ده إذا كان فيهم حد نضيف أصلًا، أنت قيمتك في شرفك وأخلاقك وأمانتك في شغلك مش في مجرد لبس مش جاي على هواهم، ده أنت اللي منضفهم ومن غيرك مايعرفوش يعيشوا صدقني، هدومك اللي مش عجباهم دي الناس السوية اللي قلوبهم مافيهاش مرض بيقولوا عليها ” هدوم الشرف ” وانت راجل محترم ومكافح وشقيان وراضي بقليلك وماشي بالحلال وبتمتهن مهنة عظيمة جدًا بالنسبالي تعادل عمل بطولي يومي تستحق عليه مننا كل الشكر والتقدير والاحترام، برا مصر بيعملوا تماثيل تكريمًا لأصحاب هذه المهنة العظيمة، بس احنا مازلنا بنعاني من بعض المرضى اللي نشروا وباءهم وتلوثهم في البلد ربنا يرحمنا منهم، ويبارك فيك وفي أسرتك ويرزقك بالحلال ويديك على قد تعبك ونيتك .. وحقك علينا كلنا يا عم وأفتكرها كلمة من أخوك
” كله للخير ” ربنا يدبرلك الصالح والخير.
– كشري التحرير .. زودها أوي وببجاحة وإنحطاط كمان، مطعم عنصري وطبقي وكل إللي فيه عديمي الادب والأخلاق سواء مديرينه أو عماله ومنهجهم متطرف ومش مجرد تصرف فردي زي ما بيتقال ويضحكوا بيه عالناس، فاكرين الست المسيحية إللي دخلت تأكل هي وبنتها الطفلة الصغيرة في شهر رمضان ومارضوش يقدمولها الأكل بحجة إن لسه وقت الفطار والآذان مجاش .. واحنا مالنا؟
ونفس الموقف بيتكرر بشكل مختلف مع رجل عامل نظافة شريف طردوه من المطعم لمجرد دخوله بلبس عمله بمنتهى قلة الأدب والذوق والبجاحة إللي في الدنيا، كل إللي بيحصل ده عيب وعيب أوي كمان يبقى موجود في مصر، وعيب نعامل بعض بالعنصرية والطبقية دي كلنا واحد ومفيش فرق بينا، كلنا هنرجع لنفس التراب إللي جينا منه ومش هتنفع في أي حاجة الفلوس أو المركز أو السلطة، عند ربنا مفيش فرق بين عباده، وأكرمكم عند الله أتقاكم مش أغناكم وأجملكم إلخ..، نتمنى الدولة المصرية العظيمة يبقى ليها دور وتحاسب المتطرفين وشوية الهمج إللي جايين من الزريبة إللي هناك، وترد إعتبار الراجل المحترم ده هو وغيره كتير لم يفصح عنهم إلي الآن، ربنا يرحمنا منهم ومن أمثالهم إللي نشروا فكر عفن لا يمكن تنظيفه، وللمرة الثانية حقك عليا يا راجل يا محترم .. صدقني لو شوفتك لأبوس أيدك ودماغك كمان.
ماتزعلش أنت مقامك كبير أوي يمكن مش عند كل الناس بس كفاية عند ربنا الأحسن من الكل.❤️
#أبانوب_فوزي
يمكنك دعم الموقع من هنا
مؤسسة ندى لحماية الفتيات
