كتّاب

كنت ف أولى إعدادى فى قرية لسة دخلاها الكهربا اللى بتيجى…

كنت ف أولى إعدادى فى قرية لسة دخلاها الكهربا اللى بتيجى…


كنت ف أولى إعدادى فى قرية لسة دخلاها الكهربا اللى بتيجى ساعتين ف اليوم هى والمياه، وتقطع أسبوع، وكنا أطفال بنرتكب كل الموبقات الكونية، بس مع قلب طاهر ومخ فاضى، قمة فى السذاجة، وانا عيل ماعنديش غير القراءة، لدرجة قريت رأس المال ل كارل ماركس وانا تسع سنين، صحيح مافهمتش حاجة بس كنت دودة كتب ولازم أخلص الكتاب، وعندى تساؤلات دينية، ولقيت الحل فى صديقى فؤاد أمين وهبة- طبعا بفضحه ف البلد دلوقتى بس هو سابها خلاص زى حالاتى- فؤاد قال لى مش محتاجة تفكير، المسيحية هى الحل، والدليل إن الرب عامل كنيسة ف مصر متعلقة ف الهواء، واللى عايز يطلع بيجيب سلم خشب؟ ياراجل؟ كنيسة متعلقة فى الهوا؟ طب قول والمصحف؟ والمصحف زى مابقولك كدة، هو انا بكذب عليك، طب هات لى الكتب بتاعتكم، راح فعلا جاب لى تفسير الأناجيل الأربعة لراجل جميل جدا إسمه وليم باركلى، لسة عندى انجيل منهم للنهاردة، والراجل دة كتابه يليق بعقل طفل ف سنى ومليان معجزات وقصص وحواديت مبهرة، كدة انت معاك حق يافؤش، المسيحية أحسن من إسلام الشيخ رمضان بتاع الكتاب اللى شفته مرة بيعبط عيل، ورفضت أدخل الكتاب ومن يومها واحنا بنكره بعض، عندك كتب تانى؟ راح جاب لى العهد القديم، وقريته بس وقلبى مقبوض، مش مستريح للرب بتاعه، صحيح عجبنى نشيد الإنشاد وأثار فى دماغى خيالات جنسية عنيفة، وكنت بحب أقراه كل ليلة قبل مانام، بس قلت جايز ربنا بيدلعنا شوية بكلام أبيح يناسب اللى زى حالاتى………
كبرت ورحت للدكتور ماهر صموئيل، بقول له أنيس منصور كان راح زيارة فى الخمسينات لمسجد فى الهند على مأافتكر، ولقى الهنود شايلين الكتب المقدسة بكل إحترام فى مكتبة مقفولة اتفتحت له مخصوص، ولقى القرآن والبخارى والمغازى والسير، ولقى ف وسطيهم كتاب ألف ليلة وليلة النسخة الأصلية الأبيحة أوى، حد ضحك عليهم وباع لهم الكتاب على إنه مقدس إسلامى وهما عاملوه بتوقير لأنهم مابيقروش عربى، تفتكر يادكتور ماهر حد ضحك ع اليهود وحط نشيد الإنشاد وسط الكتب المقدسة واتكسفوا يطلعوه تانى؟
رد د ماهر الطبيب النفسى بكل إيمان، إطلاقا، دة سفر مقدس بلسان الله، وهو الجنس عيب ولا حرام؟ ولا انت تشترط ع الرب يقول ايه ويتكسف مايقولش ايه؟ أنا زمان ياشومان كنت بمشى على نهج الآباء وبقول سفر رمزى، لما كبرت وبقيت واثق من معلوماتى بقيت بقولها بكل صراحة دة سفر جنسى ومقدس فى نفس الوقت، الجنس هو الغريزة الأقوى على ظهر الأرض………..
الشباب المتشنجين على الصفحة من رأى د ماهر: هو البيه عنده مشاكل فى الأداء الجنسى؟ هى الهانم مالهاش ف الصنف وقافلة رجليها حلالا وحراما؟ خير ياجماعة إنتوا شايفينه عار للدرجة دى؟ ماهو دة السبب اللى بيخلى نسوانكم تطفش وتروح للعيال المسلمين اللى الجنس عندهم سنة، بطلوا شغل سهوكة بقى يا رجالة بتستخبى تحت السرير يوم الخميس، ونسوان عايزة ومش لاقية رجالة، جتكوا الأرف مليتوا البلد…………….
توبو- يارمم- فقد اقترب الملكوت…………….


يمكنك دعم الموقع من هنا
مؤسسة ندى لحماية الفتيات

اترك رد

زر الذهاب إلى الأعلى