حـرام على أي رب أسرة خاصةً في الظروف الصعبة دي يدخن بالعلبة و العلبتين سجاير كل يوم .. يعني أقل حاجة في حدود ٥٠ جنيه يوميًا طايرة في الهوا و مرمية تحت الجزمة ، يعني ١٥٠٠ في الشهر ، في حين إن المرتبات أغلبها لا يتعدى الـ ٣٠٠٠ شهريًا ، و في الاخر يلعن في البلد و في الظروف و يدُور يشتكي بالفقر ، ويحمِّل على بيته ويضغط ولاده ويضيق عليهم عيشتهم ويخنقهم علشان البيه يرضي دماغه و كيفه و طُز في أي حاجة تاني بالنسبة له ، ده في ناس ممكن ما تجيبش أكل لبيتها و لنفسها في سبيل عدم الاِستغناء عن السيجارة (الرضعة) ، حرام عليكم أتقوا الله في(نفسكم و مالكم و صحكتم و أولادكم ..) ، في حاجات مش مهمة و مش أساسية مُمكن نستغنى عنها علشان نقدر نعيش و نصرف على حاجات بيتنا الأساسية ، و ابنك يا عزيزي المُدخِن إللي خلفته مش مطلوب منه تشيله هم و حِمل فوق طاقته و مش مُلزم بيه أصلًا و هو بيدرس و عايز يتعلم و يبقى حاجة ، و مش كل جنيه تديهواله تحسسه إنك بتتفضل عليه .. لأ يا حبيبي ده واجب عليك ، و لو كنت عارف نفسك مش هتقدر تعيشه حياة كريمة آدامية بسيطة زي أي إنسان عادي ماكنتش خلفته من الأول ، ما تحملش نتيجة أخطاءك لناس مالهاش ذنب ، كل واحد شايل شيلته بالعافية ، مطلوب مننا يكون عندنا شوية حكمة و وعي وتدبير لبيوتنا لحد ما الأزمة دي تعدي على خير ، زوجتي و أولادي عندي أهم حاجة و هستغنى عن أي حاجة مالهاش لازمة علشانهم و علشان راحتهم ، عارف ان الاِقلاع عن التدخين حاجة مش سهلة أبدًا .. بس واحدة واحدة بشوية إرادة و عزيمة و ربنا معانا طبعًا أهم حاجة هنقدر نتخطى أي شيء بيذلنا و يستعبدنا ، ربنا يُسترنا و يُستر بيوتنا جميعًا و يسدد اِحتياجاتنا، و لا يكسر أب قدام ولاده أبدًا .. ربنا معاكم.
#أبانوب_فوزي
يمكنك دعم الموقع من هنا
مؤسسة ندى لحماية الفتيات
