حبيبتي إليان:
بمعزل عن قرف وجبن ونذالة كل متحرّش ، يلي حابة قلّك ياه ولكل صبية هو الآتي:
بفهم خوفِك ، بحترم وجعك ، وبعرف إنو يلي إيدو بالنار مش متل يلي إيدو بالميّ الباردة (وهي إنو أنا كمان ، وعلى الرغم من كل بنت ع وجّ هالأرض ، تعرضنا ومنضل نتعرّض لهيك مواقف وتروما). بس الحلّ منّو إنو البنات يصيروا يعتلوا هم يضهروا لوحدن من البيت ، أو يغيروا طريقة لبسن. لأنو هيك ، بيكونوا جماعة التخلف والذكورية ربحوا. بيكونوا جماعة يلي بدن يرجعوا المرأة "حرمة" ربحوا.
فـَ من هلق لوقت ما يصير عنّا توعية أخلاقية وفكرية من عمر زغير تْفهِّم الشباب كيف يحترموا البنات (مش تْفهِّم البنات كيف ما "يستفزوا" الشباب) ، ومن هلق لوقت ما يصنع عنّا دولة قانون بتفك رقبة كل واحد بلا أخلاق متل هيدا ، الحل برأيي هوي الدفاع عن النفس والمواجهة. بقدر تتطلب. مش قصدي نعمل سوبروومان ونركض ركض صوب المشكل ، أو نتهوّر ونعرّض حالنا للقتل. بس ضروري يكون عنّا ، كل وحدة منّا ، أداة لأذية المتحرش. الشتم حلال. اللبط بين الفخاد حلال. رش رذاذ الفلفل حلال. ينطوي.
هذه دعوة الى العنف نعم. إذا حدا مزعوج يخبرني. بحلّها بيني وبينو.
# تحرش # ذكورية # مواجهة # نسوية
