كتّاب

صدقوني سيناريو خطف البنات المسيحيات ده أكبر كدبة شوفتها في…


صدقوني سيناريو خطف البنات المسيحيات ده أكبر كدبة شوفتها في حياتي، هقولكم إللي فيها وبأمانة

أي بنت بتمشي بيكون بكامل إرادتها.. تمام.. طبعًا أهلها بيبقوا عارفين في الغالب أنها مشيت بمزاجها بسبب مُعاملتهم الزبالة ليها والضغط النفسي والقرف إللي كانوا معيشينها فيه.. فالبنت بتضطر تترك دينها وتعتنق دين تاني هي مش مؤمنة ولا مقتنعة بيه لكن بالنسبة لها وسيلة إنقاذ للهروب من الجو الخنيق إللي هي فيه.. حلو.. حلو..

الأهل بقا عايزين بنتهم شرفهم وعرضهم وطولهم وكل الكلام ده بالأخص لو كانوا فلاحين أو صعايدة، يجيبوا بنتهم إزاي؟!

لازم نضغط على الدولة ونلوي دراعها ونطلع فتن وشائعات وشوية لجان وصفحات يروجوا أنها أتخطفت، مع علمهم الكامل بالكدبة إللي بيحاولوا يعملوا نفسهم مصدقينها، فأنا كمصري أولًا قبل كوني مسيحي، تهمني جدًا مصلحة بلدي وصورتها قدام العالم كله، فمش هقبل أبدًا على نفسي أتبع الأسلوب القذر ده، احنا إللي علينا نشوف الخلل والتقصير منين، مش نكدب ونهيج الرأي العام ونطعن ونشكك في نزاهة أمن بلدنا، دي لعبة قذرة للضغط على أجهزة الدولة علشان يرجعوا البنت إللي هم أصلًا سبب ضياعها.

يروح الأمن جايب البنت عايزة أهلك وترجعيلهم لأ مش راجعة.. طيب حلو بقا يا أبوها وأمها وكل إللي مشيوا وراهم وصدقوا حوار الخطف ده.. عاجبكوا منظركم المخجل ده.!!

إحنا نشوف التقصير فين ونعالج ونصلح مش نكدب ونطلع شائعات ونقلب البلد ده لا يمكن أقبل بيه أبدًا، جموع المسيحيين رجاء محبة محدش ينساق للحملات والدعوات دي، خلوا عندكم حكمة شوية وخوف على بلدكم، إللي بيحصل ده تأثيره كبير جدًا ع الدولة، مصر دولة آمنة الحمد لله مافيهاش خطف ولا غيره، إللي بيمشي بيغور بمزاجه، كفاية كدب ودوشة وهوجة ووجع دماغ، صلوا وبس.

ربنا يحفظ بناته من كُل شر، ويا أهالي يا محترمين خافوا على بناتكم علشان ماتعيطوش بعد ضياعهم منكم، وقدام ربنا أنتوا المسؤولين عن إللي وصلولوه، سواء حبت واحد أو كانت عايز تمارس الجنس وتعيش حياتها أو أي هدف تاني أنتوا إللي رخصتوا قيمتها وخلتوها تشحت الحب وأي حد يقولها كلمتين حلوين تترمي في حضنه، حرام عليكم بجد.

#أبانوب_فوزي

يمكنك دعم الموقع من هنا
مؤسسة ندى لحماية الفتيات

Abanoub Fawzy ابانوب فوزي

شاعر ـ كاتب قبطي

اترك رد

زر الذهاب إلى الأعلى